İnsan həyatı səssiz, lakin dərin bir şahmat oyunudur. Hər bir addım — düşüncənin, vicdanın və niyyətin aynasıdır. Bu oyunda şansa bel bağlanmaz; nərddə zər nəyi göstərsə, o oynanır, amma həyat fərqlidir — burada gedişləri şüur formalaşdırır, ruh yönləndirir, vicdan dəyərləndirir.

Cəmiyyət içində bəziləri gülümsəyərək pislik edər, üzündə nur, içində zəhər daşıyar. Onlar xaraktersizlik virusunu yayırlar — gözə görünməz, lakin ruhları çürüdən bir xəstəlikdir bu. Səmimiyyəti təqlid edən saxta davranışlar, dürüstlüyü maskalayan ikili üzü — insanlıq bu oyunlarda uduzur, əgər ayıq qalmasa.

Namərdlik — təkcə bir davranış deyil, bir ruh halıdır. O, insanı içdən zəiflədir, onu prinsiplərindən ayırır. Vicdansızlıq, qorxaqcasına gedişlər edərək öz mənliyini itirməyə doğru aparır.

Amma yenə də ümid var: çünki hər oyun yeni bir başlanğıcdır. Hər doğru addım — zəhərin içində bir dərmandır. Mərdlik, dürüstlük və sədaqət bu taxtanın ən dəyərli fiqurlarıdır. Onlar qələbəni gətirməsə belə, məğlubiyyətin içində bir ləyaqət qoyur.

Əgər insan hər addımını düşünərək, vicdanla və əyri yollardan uzaq gedirsə — deməli, o həyatı doğru oynayır. Çünki bu oyunun sonunda, qalib adını daşıyan deyil, ləyaqətini itirməyən xatırlanacaq.

Mövsümağa Ədalətoğlu
Yazıçı-publisist.