22 sentyabr 1986-cı ildə Xaçmaz şəhərində anadan olub.

1993-2002-ci illərdə Xaçmaz şəhəri, İsmət Qayıbov adına 3 saylı tam orta məktəbində təhsil alıb.

2002-2005-ci illərdə General Cəmşid Naxçıvanski adına Hərbi Liseydə hərbin sirlərinə yiyələnib.

2005-2009-cu illərdə Heydər Əliyev adına Azərbaycan Ali Hərbi məktəbində hərbin nəzəriyyəsini və döyüş taktikasını mükəmməl öyrənib.

2009-2010-cu illərdə Azərbaycan Respublikası Silahlı Qüvvələrinin Təlim Tədris Mərkəzində leytenant kimi dinləyici olaraq təhsil alıb və oranı müvəffəqiyyətlə bi¬tir¬dik¬dən son¬ra xidmətə başlayıb. 2010-cu ildən 2011-ci ilədək Mingəçevir şəhərindəki N saylı hərbi hissədə, 2011-ci ildən 2013-cü ilədək Gəncə şəhərindəki “N” saylı hərbi hissədə taqım komandiri, batareya komandiri, 2015-ci ildən Ağcabədi rayonundakı “N” saylı hərbi hissədə batareya komandiri kimi xidmətini davam etdirib. 2016-cı ilin Aprel döyüşlərində Talış kəndi istiqamətində gedən hərbi əməliyyatlarda batareya komandiri kimi iştirak edib. Lələtəpə yüksəkliyinin alınmasında komandiri olduğu batareyanın hərbi heyətinin xidmətləri böyükdür.
Peşəkar hərbçi və qətiyyətli komandir Vüqar Məlikovun hərbi xidmətləri 2009-cu ildə leytenant, 2012-ci ildə baş leytenant, 2016-cı ildə kapitan, 2020-ci ildə mayor hərbi rütbəsinə layiq görülüb.

2020-ci il sentyabr ayının 27-də Ermənistan silahlı qüvvələrinin beynəlxalq hüquq normalarını kobud surətdə pozaraq, müxtəlif növ silahlardan, o cümlədən ağır artilleriyalardan (iki həftə sonra düşmən tərəf dinc yaşayış məntəqələrimizə ballistik raketlərdən atəş açmağa başlayıb) istifadə etməklə bir neçə istiqamətdən Azərbaycan Respublikasına qarşı növbəti hərbi təxribatını və Silahlı Qüvvələrimizin əks-hücum əməliyyatlarına başladığını nəzərə alaraq elə ilk gündən rəhbərlik etdiyi diviziyanın komandiri olaraq heyət ilə birlikdə Füzuli, Cəbrayıl, Ağdam, Xocavənd rayonlarının və kəndlərinin, Şuşa şəhərinin düşmən tapdağından azad olunması əməliyyatlarında qəhrəmancasına döyüşüb. Dəfələrlə iştirak etdiyi hərbi əməliyyatları uğurla başa çatdıran diviziya komandiri Zəfərimizi haqq edənlərdəndi.

O, həmçinin 2022-ci ilin 12-15 sentyabrında Laçın rayonu ərazisində gedən döyüşlərin iştirakçısı olub.
2023-cü ilin 19-20 sentyabrında ordumuzun apardığı lokal xarakterli antiterror əməliyyatlarında Şuşa-Xankəndi istiqamətlərində komandiri olduğu diviziyanın heyəti ilə birlikdə komandanlığın verdiyi bütün tapşırıqlara yüksək səviyyədə əməl edərək döyüşün qələbəmizlə başa çatmasına öz köməklərini göstəriblər. Onun özü və başçılığı altında döyüşən zabit və əsgərlər həqiqətən şücaətləri ilə yeni tariximizin salnaməsini yazıblar.
Mayor Vüqar Məlikov 2021-2023-cü illərdə Hərbi Akademiyada (Hazırda Milli Müdafiə Universiteti) magistr təhsili alıb.
Azərbaycan Respublikası Silahlı Qüvvələrinin Müzəffər Ali Baş Komandanı, Prezident İlham Əliyevin sərəncamına əsasən döyüşlərdə göstərdiyi şücaətlərə görə “Qarabağ” ordeninə, “Xocavəndin azad olunmasına görə”, “Ağdamın azad olunmasına görə”, Azərbaycan Respublikasının Baş Nazirinin imzaladığı “Vətən müharibəsi iştirakçısı”, Azərbaycan Respublikasının Müdafiə Nazirinin müvafiq əmri ilə “Qüsursuz xidmətə görə” 3-cü dərəcəli, “Qüsursuz xidmətə görə” 2-ci dərəcəli, “Azərbaycan Respublikası Silahlı Qüvvələrinin 95 illiyi (1918-2013)”, “Azərbaycan Ordusunun 100 illiyi (1918-2018)” yubiley medallarına layiq görülüb. Müdafiə nazirliyinin rəhbərliyi tərəfindən bir çox Fəxri Fərman və diplomlarla, təşəkkürnamələr və qiymətli hədiyyələrlə təltif olunub.

Hal-hazırda Ağcabədi rayonundakı “N” saylı hərbi hissədə diviziya komandiri vəzifəsində mayor rütbəsində xidmətini davam etdirir.
Vətən müharibəsi veteranıdır.

Evlidir, qızı Fidan 12, oğlu Telman 8 yaşlarındadır.

Respublikanın Əməkdar jurnalisti, müharibə veteranı Əntiqə Qonağın "44 günlük savaşın 444 cəngavəri" adlı üçcildliyindən