Oktyabrın 17- də Sumqayıt Muğam Mərkəzində Vətən uğrunda canından keçmiş qəhrəman şəhidlərimizin əziz xatirəsinə həsr olunmuş “Səni necə tanıdım” (I Cild) adlı kitabın təntənəli təqdimat mərasimi keçirildi. Tədbirdə şəhid ailələri, qazilər, hərbçilər, əsgərlər, tanınmış ziyalılar və mətbuat nümayəndələri iştirak etdilər.

​Layihənin rəhbərləri İlhamə Müslümova və Namiq Müslümov cütlüyüdür. Nəşrin bütün maliyyə xərclərini öz üzərinə götürən layihə rəhbərləri, milli-mənəvi dəyərlərimizin və şəhidlik zirvəsinin təbliğində böyük fədakarlıq nümayiş etdirdilər.
Çıxışlarımızda da qeyd etdik ki, bu cür irimiqyaslı kollektiv layihələrin davamlı olması üçün gələcəkdə xeyriyyəçi iş adamlarımızın və sponsorların dəstəyinə böyük ehtiyac var.

​Təqdim olunan kitabda 60 yazar tərəfindən 60 şəhidimiz haqqında qələmə alınmış hekayə və şeirlər toplanıb. Xüsusilə qürurvericidir ki, bu müəlliflərdən 11-i qardaş Türkiyədən olan yazarlardır. Türkiyəli müəlliflərin Azərbaycan şəhidlərinin ömür və döyüş yolunu qələmə alması Azərbaycan-Türkiyə qardaşlığının, sarsılmaz birliyinin və “Bir millət, iki dövlət” ideyasının növbəti bariz nümunəsidir.

Kitablar şəhid ailələrinə, müəlliflərə, həmçinin şəhidlərimizin təhsil aldıqları məktəblərə və ali hərbi müəssisələrə pulsuz paylandı.
​Tədbirin rəsmi hissəsi layihə rəhbərlərinin açılış nitqi ilə başladı. Daha sonra kitabın redaktoru, ön söz müəllifi və yazarlarından biri olaraq mən - Adilə Nəzərova, redaksiya heyətinin üzvlərindən Gülnarə Cəmaləddin, eləcə də Türkiyədən təşrif buyurmuş yazar qonaqlar çıxış edərək layihənin mənəvi əhəmiyyətindən danışdıq. Tədbirdə Türkiyə Respublikasının Azərbaycandakı Səfirliyinin nümayəndəsi də iştirak edərək öz səmimi təbriklərini və kitabın əhəmiyyətini ifadə etdi.
Naxçıvandan gələn, Vətən uğrunda iki oğlunu şəhid vermiş atanın çıxışı tədbir iştirakçılarına son dərəcə təsirli və kövrək anlar yaşatdı. Şəhid atasının qürurlu və məğrur duruşu, eləcə də ürəkdağlayan sözləri zaldakı hər kəsin dərin ehtiramına səbəb oldu.

​Rəsmi hissədən sonra tədbir bədii proqramla davam etdi. Bədii hissədə vətənpərvərlik mövzusunda, şəhidlərimizin uca xatirəsinə həsr olunmuş şeirlər qiraət olundu, qəhrəmanlığı və zəfərimizi tərənnüm edən mahnılar səsləndi.

​Yüksək təşkilatçılıqla baş tutan bu möhtəşəm tədbir şəhidlərimizin adının əbədiləşdirilməsi və gələcək nəsillərə çatdırılması yolunda atılmış mühüm bir addım kimi yaddaşlara həkk olundu.
Əməyi keçən hər kəsə təşəkkür edirəm.

Adilə Nəzər
20.10.2026