Bu gün Qahirədə Azərbaycanın səkkiz ölkənin təmsil olunduğu İqtisadi Əməkdaşlıq Təşkilatının (D-8) tamhüquqlu üzvü olması məsələsinə baxılıb.

Bu məsələ dekabrın 18-də Misirin paytaxtı Qahirədə keçirilən D-8 Xarici İşlər Nazirləri Şurasının toplantısında müzakirə edilib.

Bu barədə açıqlama verən Türkiyənin xarici işlər naziri Hakan Fidan bildirib ki, D-8-in bütün potensialını açmaq üçün bütün üzvlər əməkdaşlığı artırmaq üçün koordinasiyalı səy göstərməlidirlər.

"Biz qabaqcıl ideyaların və həllərin inkişafının stimullaşdırılmasında texnologiyanın həyati rolunu dərk etməliyik. Biz Azərbaycanın üzvlüyünü tam dəstəkləyirik. İnanırıq ki, Şura dekabrın 19-da keçiriləcək Sammitdə təsdiqi üçün tövsiyə edəcək".

Təşkilatın Qahirədə keçirilən zirəv toplantısında Azərbaycan təşkilata üzv qəbul edilib. Pakistanın Baş naziri Məhəmməd Şahbaz Şərif Qahirədə D-8-in 11-ci Zirvə görüşündə Azərbaycanı təbrik edib. “Mən qardaş ölkə Azərbaycana D-8-in yeni üzvü kimi salamlayıram, ona xoş gəldiniz demək istəyirəm”, - Baş nazir vurğulayıb.

O, Azərbaycanın D-8-in hədəflərinə çatmasına öz töhfəsini verəcəyinə əminliyini ifadə edib.

Qahirədə keçiriləcək D-8 toplantısında Azərbaycanı baş nazir Əli Əsədov təmsil edir.

Xatırladaq ki, D-8 İqtisadi Əməkdaşlıq Təşkilatına üzv olan səkkiz müsəlman ölkəsini birləşdirir. Təşkilatın təməli Türkiyənin o dövrdəki baş naziri Nəcməddin Ərbakanın təşəbbüsü ilə 1996-cı il oktyabrın 22-də İstanbulda Banqladeş, İndoneziya, İran, Malayziya, Misir, Nigeriya və Pakistanın əməkdaşlığı ilə təşkil edilən İnkişaf Əməkdaşlıq Konfransında atılıb. 1997-ci il iyunun 15-də İstanbulda 8 ölkənin dövlət və hökumət başçılarının sammitində təşkilat rəsmən elan olunub.