Qarabağ qaziləri İctimai Birliyinin Gəncə filialında Azərbaycan Respublikasının Prezidenti, Müzəffər Ali Baş Komandan İlham Əliyevin ad günü münasibətilə mənəvi dəyəri yüksək olan tədbir keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Ulu Öndər Heydər Əliyevin və Vətən uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

Daha sonra tədbiri Qarabağ qaziləri İctimai Birliyinin Gəncə filialının mətbuat xidmətinin rəhbəri Ceyhun Əliyev açaraq iştirakçıları salamlayıb. O, Müzəffər Ali Baş Komandanın rəhbərliyi ilə qazanılan tarixi Zəfərin əhəmiyyətindən danışıb, bu qələbənin şəhidlərin qanı, qazilərin fədakarlığı və xalqın birliyi hesabına əldə olunduğunu vurğulayıb.

Tədbirdə çıxış edən Qarabağ qaziləri İctimai Birliyinin Gəncə filialının sədri Eyvaz Hüseynov Prezident İlham Əliyevin qətiyyətli və prinsipial liderliyinin Azərbaycanın tarixində dönüş nöqtəsi olduğunu bildirib. O qeyd edib ki, məhz Müzəffər Ali Baş Komandanın siyasi iradəsi, güclü ordunun formalaşdırılması və xalq–ordu birliyi sayəsində Azərbaycan torpaqları işğaldan azad edilib. Eyvaz Hüseynov şəhid ailələrinə və qazilərə göstərilən dövlət qayğısının daim yüksək səviyyədə olduğunu xüsusi vurğulayıb.

Tədbirdə şəhid ailələri, Vətən müharibəsi qaziləri, şəhər ictimaiyyətinin nümayəndələri, eləcə də müxtəlif sahələri təmsil edən qonaqlar iştirak ediblər. Çıxışlarda dövlət başçısına dərin hörmət və ehtiram ifadə olunub, ölkəmizin gələcək inkişafı naminə uğurlar arzulanıb.

Tədbir çərçivəsində bir qrup tibb işçisi və idmançı Qarabağ qazilərinə göstərdikləri mənəvi dəstəyə və ictimai fəaliyyətlərinə görə Təşəkkürnamə ilə təltif olunub. Həmçinin qonaqlara Qarabağ qaziləri İctimai Birliyinin Gəncə filialının fəaliyyətinə həsr olunmuş kitab təqdim edilib.

Tədbirin sonunda qazilər tərəfindən Prezident İlham Əliyevin ad günü münasibətilə hazırlanmış simvolik tort kəsilib, iştirakçılar dövlət başçısına möhkəm cansağlığı, uzun ömür və Azərbaycanın tərəqqisi naminə yeni nailiyyətlər arzulayıblar.

Tədbir yüksək mənəvi ovqat, birlik və həmrəylik ruhunda başa çatıb.

@Patriot News.az