Azərbaycanın hərb tarixi - ən şərəfli səhifəsi 26 iyun 1918-ci ildə açılmışdır. Bildiyimiz kimi, həmin gün Azərbaycan Xalq Cümhuriyyətinin qərarı ilə ilk nizami hərbi hissə – Əlahiddə Azərbaycan Korpusu yaradılmışdır. Müsəlmanlardan ibarət bu Korpusun adının dəyişdirilərək Əlahiddə Azərbaycan Korpusu kimi adlandırılması həmin vaxtlar milli silahlı qüvvələrin yaradılması istiqamətində mühüm addım olmuş, bu hadisə belə deyək, milli ordu quruculuğu istiqamətində ilk addımlar kimi zəmin tapmışdır.

Təəssüf ki, Azərbaycanın o dövrlərdə ordu qurmaq istəyi uzun sürməmiş, 1920-ci il 28 apreldə Sovet imperiyasının təcavüzü nəticəsində Xalq Cümhuriyyəti süqut etmişdir. Bu da ölkəmizdə ordu quruculuğu prosesini dayandırmışdır.

Yalnız Ulu Öndər Heydər Əliyevin 1969-cu ildə hakimiyyətə gəlməsindən sonra o, Milli Ordu quruculuğunda əsaslı dönüş yaratmış, müstəsna xidmətləri sayəsində ölkəmizdə hərbi kadrların hazırlanması prosesinə start vermişdir...

Birmənalı etiraf edilir ki, Heydər Əliyevin 1971-ci ildə böyük zəhmətlər bahasına Azərbaycanda hərbi kadrlar hazırlayan məktəbin – görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail olması milli ordu qurmaq siyasətinin ən başlıca məziyyətləridir.

Ölkəmizdə dövlət müstəqilliyi bərpa edildikdən sonra 1993-cü ilin yayında Ümummilli Lider Heydər Əliyevin xalqın tələbi ilə yenidən hakimiyyətə qayıtması onun həm iqtisadi-siyasi, həm də ordu quruculuğu işində böyük nailiyyətlərə imza atmasını təmin etmişdir. Ulu Öndərin 22 may 1998-ci il Sərəncamına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olunmuş və hər il bu tarix rəsmi dövlət bayramı kimi qeyd edilmişdir, bu gün də eyni missiyanı kəsb edir.

Bu gün Qafqazda ən müasir ordu hesab olunan Azərbaycan Milli Ordusu ölkə Prezidenti İlham Əliyevin rəhbərliyi altında əməli xidmətlərə imza atır. Məhz bu Müzəffər Ordu 44 günlük Vətən müharibəsində işğala son qoydu, Azərbaycanın ərazi bütövlüyünü təmin etdi.

Çox xoşbəxtik ki, bu gün ölkəmizdə Heydər Əliyev ənənəsi uğurla davam etdirilir. Bu, o anlama gəlir ki, dövlətin gücü xalqın dəstəyidir... Nə xoş ki, bu gün də ölkədə dövlət siyasəti xalq tərəfindən dəstəklənir və bu siyasətə hamımızda böyük inam var.

Biz Azərbaycan vətəndaşları – ziyalıları Ali Baş Komandan İlham Əliyevin apardığı müasir ordu quruculuğu siyasətindən qürur duyur, iftixar hissi keçiririk.
Bayramınız mübarək, əziz Silahlı Qüvvələrimiz!

Mövsümağa Abasov,
Yazıçı-publisist