05 noyabr 2026-cı il tarixində “Saatlı Gənclər evi” sosial xidmət müəssisəinin inzibati binasında Saatlı Rayon İcra Hakimiyyətinin, Yeni Azərbaycan Partiyası Saatlı rayon təşkilatının və Mil-Muğan Regional Gənclər və İdman İdarəsinin birgə təşkilatçılığı ilə 8 Noyabr – Zəfər Gününə həsr olunmuş məktəblilərin əl işlərindən ibarət sərgi, eləcə də, yarış və müsabiqələrin qaliblərinin mükafatlandırılması mərasimi keçirilib.
Tədbir ilk olaraq Zəfər Gününə həsr olunmuş məktəblilərin əl işlərindən ibarət sərgiyə baxışla başlayıb. Daha sonra rəsmi hissə ilə davam edən tədbirdə ilk öncə Azərbaycan Respublikasının Dövlət Himni səsləndirilib, daha sonra ölkəmizin ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan Saatlı Rayon İcra Hakimiyyətinin başçısı Elmir Bağırov 8 Noyabr – Zəfər Gününün xalqımızın tarixindəki müstəsna əhəmiyyətindən, 44 günlük Vətən müharibəsində Azərbaycan Ordusunun göstərdiyi qəhrəmanlıq və şücaətdən, xalqımızın sarsılmaz birliyindən bəhs edib. O, bu kimi tədbirlərin gənc nəslin vətənpərvərlik ruhunda yetişməsində, onlarda Vətənə, dövlətə və milli dəyərlərə bağlılıq hissinin gücləndirilməsində mühüm rol oynadığını qeyd edib. Həmçinin gənclərin tarixi qələbəmizin mahiyyətini dərindən dərk etməsinin və şəhidlərimizin qəhrəmanlıq yolunu özlərinə örnək götürməsinin vacibliyini vurğulayıb.
Daha sonra çıxış edən YAP Saatlı rayon təşkilatının sədri Elşən Əzizov və Mil-Muğan Regional Gənclər və İdman İdarəsinin rəisi Elçin Qiyasov 44 günlük Vətən müharibəsi dövründə şəhidlərimizin göstərdikləri qəhrəmanlıq və fədakarlıqdan, həmin ağır günlərdə rayon əhalisinin nümayiş etdirdiyi birlik, həmrəylik və yüksək vətənpərvərlik nümunəsindən bəhs edərək, cənab Prezident İlham Əliyevin rəhbərliyi ilə ölkəmizin ərazi bütövlüyünün bərpa olunmasının tarixi əhəmiyyətini vurğulayıblar.
Tədbirin sonunda keçirilən yarış və müsabiqələrdə qalib olmuş iştirakçılara rayon icra hakimiyyəti başçısının Fəxri Fərmanları təqdim olunub, təşkilatçı qurumlar tərəfindən qaliblər müxtəlif hədiyyələrlə mükafatlandırılıblar.