20 oktyabr 2026-cı il tarixdə Saatlı Rayon Mədəniyyət Mərkəzində Yeni Azərbaycan Partiyasının VIII qurultayında müzakirə olunan məsələlərə həsr olunmuş müşavirə keçirilib.
Tədbiri giriş sözü ilə açan Saatlı Rayon İcra Hakimiyyətinin başçısı Elmir Bağırov çıxışında Yeni Azərbaycan Partiyasının yaranma tarixindən, keçdiyi inkişaf yolundan və ölkənin ictimai-siyasi həyatındakı rolundan geniş bəhs edib. O, Ulu Öndər Heydər Əliyevin əsasını qoyduğu siyasi kursun Prezident İlham Əliyev tərəfindən uğurla davam etdirildiyini, ölkəmizin sosial-iqtisadi inkişafı, beynəlxalq mövqelərinin möhkəmləndirilməsi və dövlətçilik ənənələrinin qorunması istiqamətində mühüm nailiyyətlərin əldə olunduğunu diqqətə çatdırıb. Rayon icra hakimiyyətinin başçısı VIII Qurultayda müzakirə olunan məsələlərin ölkənin gələcək inkişaf prioritetlərinin müəyyənləşdirilməsi, dövlət siyasətinin əsas istiqamətlərinin davam etdirilməsi və qarşıda duran vəzifələrin həyata keçirilməsi baxımından əhəmiyyətini vurğulayıb.
Daha sonra Saatlı Rayon Ağsaqqallar Şurasının sədri Sədafər Hüseynov, Saatlı rayonu üzrə təhsil sektorunun müdiri Günay Sultanova, V. Əzimov adına Qıraqlı kənd tam orta ümumtəhsil məktəbinin direktoru Zülfiyyə Əzimova, şəhid bacısı Ürvət Ağayeva, Vətən müharibəsi əlili Elvin Abbasov, rayon Ziyalılar Cəmiyyətinin sədri Lətif Şimşəkov və Saatlı Uşaq və Ailələrə Dəstək Mərkəzinin direktoru Gülnar Babaşova da çıxışlarında qurultayda müzakirə olunan mühüm məsələlərə toxunublar. Natiqlər Ulu Öndər Heydər Əliyevin siyasi irsinin əhəmiyyətini, Prezident İlham Əliyevin rəhbərliyi ilə həyata keçirilən dövlət siyasətini, ölkəmizin qazandığı nailiyyətləri və milli həmrəyliyin qorunmasının vacibliyini qeyd ediblər.