Bakı küçələrinin hərəkətli axarında avtobusların sükanı arxasında oturan sürücülər sadəcə yolçuları bir nöqtədən digərinə aparmırlar. Onlar gündəlik həyatın ritmini qoruyan, ictimai mədəniyyətin səssiz daşıyıcılarıdır. Bu peşənin dəyəri yalnız məsafə ilə ölçülmür, həm də insanlara göstərilən hörmətlə, qayğı ilə ölçülür.

Hacıməmmədli İbrahim Alim oğlu – Ucar torpağının səmimiyyətini Bakının sürətli ritminə gətirən bir sürücüdür. İki ilə yaxındır ki, Bakubus ailəsinin üzvü olan İbrahim müəllim, hazırda 120E marşrutunda yüzlərlə sərnişinə xidmət göstərir. Onun sükan arxasındakı təmkinli davranışı, üzündəki təbəssüm və sərnişinlərlə hörmətlə danışması, sadəcə peşə borcu deyil, vicdanın və mədəniyyətin təcəssümüdür.

Cəmiyyətin bu gün ən çox ehtiyac duyduğu keyfiyyətlər – təmkin, səmimiyyət və insana dəyər vermək – onun davranışında birləşir. Bu səbəbdən İbrahim Alim oğlu yalnız bir sürücü deyil, həm də ictimai nümunədir. Onun işinə yanaşması, vətəndaşların rəğbətini qazanması bütün nəqliyyat sistemində çalışanlara örnək ola biləcək bir modeldir.

Belə insanlar rəhbərlik tərəfindən sadəcə təşəkkürlə deyil, həm də ictimai dəyərlə qiymətləndirilməlidir. Çünki onlar gündəlik həyatın görünməyən qəhrəmanlarıdır – şəhərin ritmini qoruyan, insanlara rahatlıq və güvən bəxş edən şəxslərdir.

Hacıməmmədli İbrahim Alim oğlu timsalında biz bir daha anlayırıq ki, peşəkarlıq yalnız texniki bacarıqla ölçülmür. Əsl peşəkarlıq insanlara hörmətlə yanaşmaq, onların yolunu işıqlandırmaq və hər gün təbəssümlə xidmət etməkdir. Bu cür nümunəvi sürücülər, əslində, şəhərin mədəni simasının ayrılmaz parçasıdır. Onların varlığı sübut edir ki, mədəniyyət yalnız böyük salonlarda deyil, gündəlik həyatın ən sadə anlarında da yaşanır.

Mövsümağa Ədalətoğlu
Yazıçı-publisist