Azərbaycan Respublikası “Müharibə Veteranı Qadınlarına Sosial Yardım“ ictimai birliyinin sədri Rada Abbas 24.05.2024 -cü il tarixində “Lake Palace” ın konfrans zalında tədbir təşkil etdi. Tədbirə qonaq qismində “Xocalı Soyqırımı Tanıtma” ictimai birliyin idarə heyətinin üzvləri, Xocalı şəhid ailələri, 44gunsavash.az saytının direktoru Mövsümağa Abasov, qardaş dövlətimiz olan Türkiyə Yunus Əmrə Bələdiyyə Başkan yardımcısı Mehmet Mesut Doğan, TADDEF Başkanı Manisa Azərbaycan Evi və GYD-Qazeteciler və Yayımcılar Təşkilatının Başkanı və bu təşkilatın üzvləri iştirak edirdi.
Tədbirin məqsədi Dünyanın diqqətini Xocalı faciəyəsinə və bunu törədənlərə qarşı çevirərək haqq səsimizi bütün sülhsevər ölkələrə çatdırmaq idi. Çünki, dünyada qəbul olunmuş beynəlxalq konvensiyalar, ümumbəşəri qanunlar Xocalı faciəsi kimi soyqırımları pisləyir, belə faciələrin yolverilməz olduğunu bildirirlər.
Rada Abbas tədbiri açıq elan edərək gələn qonaqları salamladı və ilk sözü
“Xocalı Soyqırımı Tanıtma” ictimai birliyinin sədri, şəhid ailəsi Əzizova Ceyran xanıma verdi.
Ceyran xanım Xocalıda baş verən hadisələrdən danışarkən göz yaşlarını saxlaya bilmədi və onuda vurğuladı ki, əslində bu göz yaşları həm də 32 il vətən həsrəti çəkmiş, indi isə Xocalıya, el-obasına qayıtmağın sevincinin göz yaşıdır. Ceyran xanım Xocalıya qayıdış sevincindən fərəhlə söhbət açdı.
Tədbirdə iştirak edən səhid ailələri Xocalı torpaqlarında baş verən hadisələrdən, torpaqlarımızın ərazi bütövlüyü uğrunda canlarından keçən qəhrəmanlarımızın, Xocalıda qətlə yetirilmiş yüzlərlə həmvətənimizin xatirəsinindən bəhs etdilər. Onlar bildirdilər ki, bu cinayət, təkcə Azərbaycan xalqına qarşı deyil, həm də bəşəriyyətə, insanlığa qarşı yönəldilən bir cinayətdir.
Daha sonra Rada Abbas sözü “Xocalı Soyqırımı Tanıtma” ictimai birliyinin sədr müavini olaraq mənə verdi.
Mən öz çıxışıma şəhid ailələrini, qonaqları və Türkiyədən gələn Türk qardaşlarımızı salamlamaqla başladım. 32 il Xocalı həsrəti çəkən Xocalı sakinlərini öz yurd yuvalarına geri dönmələri münasibəti ilə təbrik etdim.
Və bildirdim ki, biz bu qalibiyyəti Azərbaycanın xilaskarı Ulu Öndər Heydər Əliyev siyasətinin davamçısı, Müzəffərt Ali Baş komandanımız İlham Əliyevin düzgün apardığı siyasi və hərbi strategiyasının, rəşadətli ordumuzun,vətən uğrunda canını fəda edən şəhidlərimizin, qazilərimizin, bir yumruq ətrafında birləşən Azərbaycan xalqının sayəsində qazanmışıq.
“Xocalı Soyqırımı Tanıtma” ictimai birliyinin sədr müavini və AJB-nin üzvü olaraq Xocalı həqiqətlərini beynəlxalq ictimai aləmə tanıtmağı, Azərbaycan torpaqlarında erməni vandallarının törətdikləri misili görünməyən vəhşilikləri dünya ictimayətinin diqqətinə çatdırmağı və bu cür vəhşiliklərə hüquqi qiymət verilməsinin tərəfdarı olmağı özümə vətəndaş borcu bilirəm. Və qeyd etməliyəm ki, bu istiqəmətdə kiçikdən böyüyə hər bir kəs əlindən gələni əsirgəməməlidir.
Son olaraq qardaş ölkə olaraq və hər bir çətin anımızda, eyni zamanda 44 günlük savaş dönəmində də yanımızda olan Türkiyə dövlətinə minnətdarlığımı bildirdim.Türkiyə dostluğu əbədidir və sarsılmazdır!

Abasov Elnur.