Qardaş... bu söz təkcə bir ailə münasibətini ifadə etmir. Bu sözün içində bir ömürlük sədaqət, sarsılmaz etibar və səssiz bir güvən yatır. Qardaş — atanın sənə qoyub getdiyi ən qiymətli yadigardır. O yadigar ki, nə zaman həyat səni sınağa çəkərsə, səni qorumaq üçün özünü qabağa verər. Sən yıxılanda əlini uzadan, susanda səni anlayan, hamı çəkiləndə yanında qalan odur.

Qardaş — səninlə eyni çörəyi bölən, eyni dam altında böyüyən, eyni acını, eyni sevinci paylaşan bir ruhdur. O, sənin keçmişinin səssiz şahidi, gələcəyinin görünməyən dayağıdır. Uşaqlıqda bir oyuncağı bölə bilmədiyin, amma böyüdükcə bir ömrü bölüşdüyün insandır. O, səninlə danışmadan danışan, baxışından halını anlayan, bir kəlmə demədən dərdini hiss edən yeganə varlıqdır.

Qardaş — səni müdafiə edən bir qaladır. Sözsüz siper olar, özünü qabağa verər, sənin üçün susar, dözər, amma səni darda qoymaz. Çünki qardaşlıq qanla deyil, ruhla bağlanır. O bağ ki, nə zaman qırılacaq kimi olsa da, içindəki sevgi ilə yenidən bərpa olunur. Qardaş səni tənqid edə bilər, amma heç vaxt səni tərk etməz. Səni danlaya bilər, amma səni satmaz. Çünki onun sevgisi şərtsizdir — nə qazanca bağlıdır, nə də şərtə.

Qardaş — bəzən bir ata qədər sərt, bəzən bir ana qədər şəfqətli, bəzən bir dost qədər səmimi, bəzən bir müəllim qədər yol göstərən olar. O, sənin səhvlərini üzünə deyər, amma arxandan heç vaxt danışmaz. Sənin uğuruna səmimi sevinər, sənin dərdinə içdən yanar. O, səssiz bir dua kimidir — sən bilmədən səni düşünər, sən demədən sənə görə narahat olar.

Qardaş — həyatın çətin yollarında səninlə çiyin-çiyinə gedən yoldaşdır. O, səninlə birgə susar, birgə dözər, birgə mübarizə aparar. Həyat səni sınayanda, insanlar səni tərk edəndə, dünya səni anlamadıqda — qardaş səni anlayar. Çünki o, səninlə eyni ağacın budağıdır. Kökünüz bir, ruhunuz birdir.

Ona görə də:
Qardaşına dəyər ver. Onun varlığını adi sayma. Çünki bir gün gələcək — səni anlayan çox az olacaq. Amma qardaşın varsa, sən heç vaxt tək olmayacaqsan. Qardaşlıq — Tanrının insana verdiyi ən səssiz, amma ən güclü nemətlərdən biridir. Onu qorumaq, yaşatmaq və dəyərini bilmək — həm borcundur, həm də xoşbəxtliyindir.

Mövsümağa Ədalətoğlu
Yazıçı- publisist.