Gəldim, gecəmə ol həmdəm,
Atəşəm, ocağam, közəm,
Yanğıma şifadır zəmzəm, -
Su...— deyib səslərəm Səni!

Ey mehriban, ey qayğıkeş,
İslam haqq yoldur - şərti beş...
Sevgi yolunun sonu Eşq!
Bu... — deyib səslərəm Səni!

Yırt sinəmi, soy dərimi,
Duy, səndən qalan ətrimi...
Gəldim qapına, dərdimi
Yu... — deyib səslərəm Səni!

Ay da çarşaf geyib göydə...
Dalğalanır damla göldə...
Qulaq tutulan bu çöldə,
Qu...— deyib səslərəm Səni!

Səcdə mənim, namaz mənim,
Qunut mənim, pərvaz mənim -
Qələm qeyri yazmaz mənim —
Hu... — deyib səslərəm Səni!

Adilə Nəzər
05.11.2026