90-cı illərin əvvəlləri idi. Mətbuat xidmətində çalışdığım Respublika Qadınlar Cəmiyyətinə həyəcanla, təlaşla dolu zəng gəldi. Bir xanım idi. Qonşu binada sığınacaq tapan 5 övladlı bir qadının əşyaları ilə birlikdə küçəyə atıldığını, bizdən kömək istədiyini ağlaya-ağlaya güc-bəla anlada bildi. Cəmiyyətin sədri professor Zemfira Verdiyeva (Allah rəhmət eləsin) məni və cəmiyyətin daha bir üzvünü səfərbər etdi. Gedib hadisəni yerində öyrənməli və xanıma məlumat verməliydik. Belə də etdik. Həqiqətən acınacaqlı vəziyyət idi. Biz də qadın təşkilatı olaraq həmin ailəyə dəstək olduq, problemi həll etdik. Zemfira Rəhimovanı o vaxt tanıdıq və cəmiyyətə dəvət etdik. Çünki bu cür vətənpərvər, yanımcıl, həqiqətpərəst, cəmiyyətdə baş verən neqativ hallara qarşı barışmaz mövqe tutan, mübariz, milli dəyərlərə hörmətlə yanaşan xanımlara sıralarımızda ehtiyac çox idi. Daha sonra Zemfira xanım "Sənsiz" İctimai Birliyini yaratdı və artıq etdiyi xeyirxah işlərin bir ünvanı oldu. Cəmiyyətin məqsədi ailə başçısını erkən itirmiş aztəminatlı ailələrə maddi və mənəvi dəstək olmaqdı. İctimai Birliyin bu yöndə gördüyü işlərin sayı-hesabı yoxdur və biz də imkan daxilində onun yanında olmağa çalışırıq.

Birliyin növbəti layihəsi "Yüksək mənəvi dəyərlərin təbliği" idi. Bu layihənin həyata keçirilməsində iki gün mən və həmkarlarımdan əməkdar jurnalistlər Zemfira Məhərrəmli, Şəmsiyyə Kərimova, şairə Elmira Aslanxanlı onun yanında olduq. 12-ci Beynəlxalq Kitab Sərgisinin keçirildiyi Bakı Expo mərkəzində iki gün dalbadal bizim də stendimiz oldu və burada məktəblilərə, tələbələrə, müxtəlif peşə sahiblərinə, sərginin iştirakçılarına iki mindən çox bukletlər payladıq, yüksək milli dəyərlərin təbliği barədə çıxışlar etdik, sosial şəbəkələrdə paylaşdıq. Bukletlərin biri Zəfərimizin altıncı ildönümünə həsr olunmuşdu, digəri isə milli dəyərlərimizə. Bu bukletlər insanların maarifləndirilməsi və milli dəyərlərimizə sevgi ruhunda köklənməsi istiqamətində mühüm rol oynayır. Qeyri Hökumət Təşkilatlarına dəstək Agentliyinin xətti ilə həyata keçirilən bu layihə çərçivəsində görülən işlər həqiqətən də təqdirəlayiqdir.

Əntiqə Qonaq, Əməkdar jurnalist