Dəyərli Aygün müəllimə!

5 Oktyabr - Beynəlxalq Müəllimlər Günü münasibətilə Sizi ürəkdən təbrik edir, möhkəm can sağlığı, ailə səadəti, pedaqoji fəaliyyətinizdə yeni uğurlar və nailiyyətlər arzulayıram.

Müəllimlik sadəcə bir peşə deyil, gələcəyi formalaşdıran müqəddəs missiyadır. Müəllim zamanın fövqündə dayanan, bir əlində elm, bir əlində mənəviyyat çırağı ilə gələcəyə yol açan, millətin sabahını yetişdirən müqəddəs bir ömür sahibidir. O, yalnız bilik vermir, həm də şəxsiyyət yetişdirir, düşüncə formalaşdırır, Vətəninə bağlı, xalqına faydalı insan tərbiyə edir.

Bu gün sevgi, səbir və fədakarlıqla təhsil verdiyiniz körpə şagirdlər sabah Azərbaycanın inkişafına töhfə verən savadlı, ləyaqətli və məsuliyyətli vətəndaşlar kimi yetişəcəklər. Onların qazandığı hər uğurda müəllim zəhmətinin, müəllim qəlbinin və müəllim vicdanının silinməz izləri yaşayacaqdır. Çünki müəllimin səpdiyi bilik toxumları zaman keçdikcə insan taleyində, cəmiyyətin tərəqqisində və dövlətin gələcəyində öz bəhrəsini verir.

Əminəm ki, illər sonra şagirdlərinizin nailiyyətlərinə şahid olduqca qürur və fəxarət hissi keçirəcəksiniz. Hər bir uğurun arxasında Sizin zəhmətiniz, səbriniz, peşəkarlığınız və şagirdlərinizə aşıladığınız inam dayanacaqdır. Müəllim üçün ən böyük mükafat yetişdirdiyi insanların uğurlarına sevinmək, onların cəmiyyətə faydalı şəxsiyyətlər kimi formalaşdığını görməkdir.

Müəllim ömrü zamanın yaddaşına yazılan ən şərəfli tale kitabıdır. Bu kitabın hər səhifəsində zəhmət, hər sətirində sevgi, hər misrasında isə gələcəyə ünvanlanmış böyük ümidlər yaşayır. İnsan həyatda çox peşə sahibi ilə qarşılaşa bilər, lakin onun taleyinə istiqamət verən müəllimini heç vaxt unutmur.

Dəyərli Aygün müəllimə, oğlum Mirəliyə göstərdiyiniz diqqətə, qayğıya, verdiyiniz bilik və tərbiyəyə görə Sizə dərin minnətdarlığımı bildirirəm. Siz uşaqların yalnız bu gününə deyil, gələcəyinə də işıq salır, onların qəlbində elmə, Vətənə və insanlığa sevgi hissi oyadırsınız. Bu nəcib xidmətiniz hər zaman yüksək ehtiram və hörmətə layiqdir.

Vətənin sabahı məhz Sizin kimi müəllimlərin sinif otaqlarında formalaşır. Bir müəllimin qəlbində yanan elm çırağı minlərlə insanın həyat yolunu işıqlandırmağa qadirdir. Buna görə də müəllim əməyinin dəyəri zaman keçdikcə daha da ucalır, mənəvi dəyərə çevrilərək cəmiyyətin yaddaşında yaşayır.

Qoy ömür yolunuz daim uğur işığı ilə nurlansın, zəhmətiniz layiqincə qiymətləndirilsin, yetişdirdiyiniz şagirdlərin hər bir nailiyyəti Sizə sevinc və qürur bəxş etsin. Sağlam, xoşbəxt və mənalı ömür sürəsiniz.
Sizi oğlum Mirəlinin və ailəmizin adından səmimi qəlbdən təbrik edir, ən xoş arzularımı çatdırıram.

Bayramınız mübarək olsun, dəyərli Aygün müəllimə!
Sizin zəhmətiniz əvəzsizdir. Çünki müəllimlərin ucaltdığı mənəviyyat sütunları üzərində xalqın gələcəyi yüksəlir, dövlətin sabahı qurulur və millətin adı tarixdə yaşayır.

Hörmətlə,
Mövsümağa Ədalətoğlu
AJB-nin üzvü

44gunsavash.az saytının
Baş redaktoru
Yazıçı-publisist