Son yagan yağışlar paytaxtda və ərtaf ərazilərdə ciddi fəsadları ortalığa çıxarıb. Bu yalnız təbiətin şıltaqlığının yaratdığı problemlər deyil, həm də şəhər təsərrüfatında mövcud olan çox ciddi çatışmazlıqdır. Hava şəraitinin kəskinləşməsi, leysan yağışlar mövcud problemləri bir daha qabardıb.
Bu yerdə bir çox suallar ortalığa çıxır. Su kollektorunun, müxtəlif təyinatlı su, qaz xəttlərinin üzərində evlər inşa olunan zaman cavabdeh qurumlar hara baxırdı? Niyə belə qanunsuzluğa icazə veriblər? Belə acınacaqlı durum yalnız subasmadan sonra yada düşür.
Təbii fəlakətlər, iqlim dəyişikliyi insanlara xəbərdarlıqdır, çağırışdır. Biz eyni gəminin sakinləriyik. Buraxılmış səhvlərdən, xoşagəlməyən hallardan hər birimiz əziyyət çəkirik. Heç bir insan övladı təbii fəlakətlərdən sığortalanmayıb. Ona görə, ev inşa edən insan, sıravi vətəndaş və həmçinin cabahdeh qurumlar da yaranmış acınacaqlı durumdan nəticə çıxarmalıdır.
Bu gün çox təəssüflənirik ki, ictimai nəzarət, medianın belə məsələlərə münasibəti yalnız problemlər ortalığa çıxdıqdan sonra yaranır. Və bir müddət keçən kimi bütün məsələlər unudulur.
Bakı şəhərində həm də urbanizasiya məsələsinə nəzər salmaq lazımdır. Paytaxtda əhali sıxlığı getdikcə daha çox hiss olunur. Urbanizasiya məsələsi və ümumilikdə şəhərsalma, yaşayış yerlərinin müəyyən edilməsində etinasızlıq faktoru nəticəsində Bakı şəhəri və ətraf qəsəbələr tamamilə yüklənib. Belə aktual mövzu ilə bağlı geniş müzakirələrə ehtiyac var.
Qənaətimcə, istər media, istərsə də QHT sektoru geniş miqyasda tədqiqatlar aparmalıdır. Yalnız şəhər təsərrüfatında deyil, bütün sahələrdə mövcud olan problemlərlə bağlı hesabatlar hazırlamalıdır. Qaldırılacaq məsələlərə, ekspertlərin hazırlayacağı hesabatlara ümumilikdə cəmiyyət, rəsmi qurumlar həssaslıqla yanaşmalıdır. Yəni sözümün canı odur ki, verilən təklifləri özümüz deyib, özümüz eşitməyək.
Əkrəm Bəydəmirli