Dekabrın 3-də NATO ölkələrinin xarici işlər nazirləri Brüsseldə görüşəcəklər.

Bu barədə NATO-nun mətbuat xidməti məlumat yayıb.

Görüşün məqsədi Haaqada iyun ayında keçirilmiş sammitdən sonra əldə olunan irəliləyişi qiymətləndirmək və 7–8 iyul 2026-cı ildə Ankarada keçirilməsi planlaşdırılan növbəti Alians liderləri sammitinə hazırlıqdır.

NATO nümayəndəsinin “UNIAN“-a bildirdiyinə görə, nazirlər şərq cinahında “Rusiyanın getdikcə daha məsuliyyətsiz davranışını” və Baltik dənizində, eləcə də Alyans sərhədləri boyunca müdafiənin gücləndirilməsi tədbirlərini müzakirə edəcəklər.

O bildirib ki, həmçinin Ukraynanın xarici işlər naziri Sbiqanın və Aİ-nin ali nümayəndəsi Kaya Kallasın iştirakı ilə NATO–Ukrayna Şurasının iclası keçiriləcək və burada Ukraynaya dəstəyin davam etdirilməsi məsələsi gündəmdə olacaq.

“Ukraynanın təhlükəsizliyi Alyansın təhlükəsizliyi ilə sıx bağlıdır. Ukraynaya qarşı müharibənin dayandırılması və ədalətli, davamlı sülhün təmin olunması səyləri davam edərkən, Ukraynanın bu gün özünümüdafiə üçün və gələcək təcavüzün qarşısını almaq üçün zəruri olan təcili hərbi yardımı alması son dərəcə vacibdir”, - NATO nümayəndəsi bildirib.

O qeyd edib ki, yardımın koordinasiyası Visbaden şəhərindəki NATO komandanlığı və müttəfiqlərin maliyyələşdirdiyi, ABŞ ehtiyatlarından texnika ötürülməsini təmin edən PURL mexanizmi vasitəsilə həyata keçirilir.