Moskva vilayətinin Krasnoqorsk şəhərində yerləşən "Crocus City Hall" konsert zalında terror aktının səkkiz iştirakçısı təqsirini qismən etiraf edib.

Bu barədə 127 zərərçəkmişin nümayəndəsi, vəkil Lyudmila Ayvar TASS-a bildirib.

"Cinayətin 15 iştirakçısından səkkiz nəfər təqsirini qismən etiraf edib, yeddi nəfər isə təqsirini boynuna almayıb", - o bildirib.

Qeyd edək ki, bu gün terror aktının bilavasitə dörd icraçısı təqsirini etiraf edib və əməllərindən peşman olduqlarını bildirib.

L.Ayvarın sözlərinə görə, Şamsidin Fariduni, Dalercon Mirzoyev, Muhammadsobir Fayzov və Saidakrami Murodali Raçabalizoda zərərçəkmişlərdən üzr istəyiblər.

14:29

Rusiyada İkinci Qərb Dairə Hərbi Məhkəməsi "Crocus City Hall"da törədilmiş terror aktı ilə bağlı işin materiallarına qapalı rejimdə baxacaq.

Bu barədə Rusiya KİV-i məlumat yayıb.

Müvafiq vəsatət istintaq sirrinin qorunması və proses iştirakçılarının təhlükəsizliyinin təmin edilməsi məqsədilə dövlət ittihamçısı tərəfindən qaldırılıb.

Bazar ertəsi məhkəmə 19 təqsirləndirilən şəxslə bağlı işə mahiyyəti üzrə baxılmasına başlayıb. Müttəhimlər terror aktı, terror fəaliyyətinə yardım, bu fəaliyyəti həyata keçirmək məqsədilə təlim keçmə və digər cinayətlərdə ittiham olunurlar.

Bundan başqa, terror aktı ilə bağlı cinayət işi çərçivəsində zərərçəkənlər tərəfindən 27 mülki iddia təqdim edilib.

Xatırladaq ki, "Crocus City Hall"da terror aktı ötən il martın 22-də baş verib. Dörd terrorçu "Piknik" qrupunun konsertində iştirak edənlərə atəş açıb, daha sonra zalı yandırıblar. Cinayətkarlar 145 nəfəri öldürüb, 550-dən çox insanı yaralayıblar.(“Report”)