Ermənistanın Baş naziri Nikol Paşinyan Nyu-Yorkda BMT Baş katibi António Quterreşlə görüşüb.

Bu barədə Ermənistan hökuməti məlumat yayıb.

Qeyd edilib ki, tərəflər görüşdə avqustun 8-də Vaşinqtonda Ermənistan və Azərbaycan arasında sülh sazişinin paraflanmasının əhəmiyyətini vurğulayıb, bunun Cənubi Qafqazda sabitliyin təmin olunmasına və regional əməkdaşlığın inkişafına mühüm töhfə verəcəyinə əminliklərini ifadə ediblər.

Bundan əlavə, Nikol Paşinyan və António Quterreş 2026-cı il oktyabrın 18-dən 30-dək Ermənistanda keçiriləcək 17-ci BMT Konvensiyasının Bioloji Müxtəliflik üzrə tədbirini müzakirə ediblər. Bu tədbir çərçivəsində tərəflər ekoloji davamlılıq və ətraf mühitin qorunması sahəsində daha sıx əməkdaşlığın vacibliyini qeyd ediblər.

Görüşdə həmçinin, qarşılıqlı maraq doğuran digər məsələlər ətrafında fikir mübadiləsi aparılıb.