21 fevral 1986-cı il¬də Xaçmaz rayonunun Xudat şəhərində anadan olub.

1994-2005-ci illərdə Xudat şəhəri, Kərim Məhərrəmov adına 3 saylı tam orta məktəbində on bir illik təhsil alıb.

2005-ci ilin oktyabr ayında SHXÇDXnin Xaçmaz rayon şöbəsindən müddətli həqiqi hərbi xidmətə çağırılıb. Azərbaycan Respublikası Silahlı Qüvvələrinin

Şəmkir rayonundakı “N” saylı hərbi hissəsində texnik vəzifəsində həqiqi hərbi xidmət ke¬çib.

2007-ci ilin aprel ayında ordu sıralarından tərxis olunub.

2014-cü ildə Azərbaycan Respublikası Silahlı Qüvvələrinin Hacı Zeynalabdin Tağıyev qəsəbəsindəki “N” saylı hərbi hissədə müddətdən artıq həqiqi hərbi xidmət hərbi qulluqçusu (MAHHXHQ) hazırlayan 45 günlük kursu müvəffəqiyyətlə bitirdikdən sonra Qusar rayonundakı “N” saylı hərbi hissədə çavuş rütbəsində manqa komandiri vəzifəsində xidmətə başlayıb. Müxtəlif hərbi hissələrdə müvafiq vəzifələrdə çalışarkən nümunəvi xidməti və hərbi intizamı ilə həmişə komandanlığın rəğbətini qazanıb.

2016-cı ilin aprel döyüşlərində BTR 82A döyüş maşınında tuşlayıcı operator vəzifəsində iştirak edib.

2020-ci il sentyabr ayının 27-də Ermənistan silahlı qüvvələrinin beynəlxalq hüquq normalarını kobud surətdə pozaraq, müxtəlif növ silahlardan, o cümlədən ağır artilleriyalardan (iki həftə sonra düşmən tərəf dinc yaşayış məntəqələrimizə ballistik raketlərdən atəş açmağa başlayıb) istifadə etməklə bir neçə istiqamətdən Azərbaycan Respublikasna qarşı növbəti hərbi təxribatının və Silahlı Qüvvələrimizin əks-hücum əməliyyatlarına başladığını nəzərə alaraq elə ilk gündən xidmət etdiyi hərbi hissənin heyəti ilə birlikdə çavuş rütbəsində manqa komandiri kimi Füzuli rayonu istiqamətindən şiddətli döyüşlərə atılıb. Füzulinin Şükürbəyli kəndi istiqamətində gedən döyüşlərdə düşmənin güclü top atəşinə məruz qalsalar da, xoşbəxtlikdən xəsarət alan olmayıb. Xocavəndin Zoğalbulaq kəndinin düşməndən azad olunması uğrunda gedən döyüşlərdə silahdaşları ilə bərabər qəhrəmancasına vuruşublar.
Azərbaycan Respublikası Silahlı Qüvvələrinin Müzəffər Ali Baş Komandanı, Prezident İlham Əliyevin sərəncamına əsasən döyüşlərdə göstərdiyi şücaətlərə görə “Xocavəndin azad olunmasına görə”, “Füzulinin azad olunmasına görə”, “Cəbrayılın azad olunmasına görə”, Azərbaycan Respublikasının Baş Nazirinin imzaladığı “Vətən müharibəsi iştirakçısı”, Azərbaycan Respublikasının Müdafiə Nazirinin müvafiq əmri ilə “Qüsursuz xidmətə görə” 3-cü dərəcəli, “Azərbaycan Ordusunun 100 illiyi (1918-2018)” yubiley medallarına layiq görülüb.

Hal-hazırda Qusardakı “N” saylı hərbi hissədə çavuş rütbəsində kargüzar-operator vəzifəsində xidmət edir.

Vətən müharibəsi veteranıdır.

Evlidir, qızı Dinara 4 yaşındadır.

Respublikanın Əməkdar jurnalisti, müharibə veteranı Əntiqə Qonağın "44 günlük savaşın 444 cəngavəri" adlı üçcildliyindən