3 sentyabr 1981-ci ildə Xaçmaz şəhərində anadan olub.

1987-1998-ci illərdə Xaçmaz şəhəri, Çingiz Abdullayev adına 2 saylı tam orta məktəbində təhsil alıb.

2000-ci ilin 15 aprelində SHXÇDX-nin Xaçmaz rayon şöbəsindən müddətli həqiqi hərbi xidmətə çağırılıb. Dövlət Sərhəd Xidmətinin Şəmkir rayonundakı “N” saylı hərbi hissəsində manqa komandiri vəzifəsində həqiqi hərbi xidmət ke¬çib.

2001-ci ilin 17 oktyabrında or¬du sıralarından tərxis olunub.

2016-ci ilin oktyabr-dekabr aylarında Azərbaycan Respublikası Silahlı Qüvvələrinin Təlim Tədris Mərkəzində müddətdən artıq həqiqi hərbi xidmət hərbi qulluqçusu (MAHHXHQ) hazırlayan kursda sanitar-təlimatçı ixtisası üzrə oxuyub və oranı müvəffəqiyyətlə bitirdikdən sonra 2017-ci il yanvar ayının 27-dən Tərtər tayonundakı “N” saylı hərbi hissədə xidmətə başlayıb. Silahlı Qüvvələrin müxtəlif hərbi hissələrində qüsursuz və nümunəvi xidmət edib. Komandanlığın tərifnamələrini, heyət üzvlərinin isə hörmət-izzətini qazanıb.

2020-ci il sentyabr ayının 27-də Ermənistan silahlı qüvvələrinin beynəlxalq hüquq normalarını kobud surətdə pozaraq, müxtəlif növ silahlardan, o cümlədən ağır artilleriyalardan (iki həftə sonra düşmən tərəf dinc yaşayış məntəqələrimizə ballistik raketlərdən atəş açmağa başlayıb) istifadə etməklə bir neçə istiqamətdən Azərbaycan Respublikasına qarşı növbəti hərbi təxribatını və Silahlı Qüvvələrimizin əks-hücum əməliyyatlarına başladığını nəzərə alaraq elə ilk gündən xidmət etdiyi hərbi hissənin heyəti ilə birlikdə Tərtər rayonunun Qəzyan kəndi istiqamətindən döyüşlərə başlayıb. Suqovuşanın, Ağdam rayonunun və kəndlərinin işğaldan azad edilməsi əməliyyatlarında fədakarcasına iştirak edib. Kəlbəcər istiqamətində Cermux əməliyyatınin müvəffəqiyyətlə başa çatmasında onun da rolu böyük olub. Noyabrın 11-13-də isə Ağdərə əməliyyatını uğurla başa çatdırıblar. Düşmənin hədəflərini, mövqelərini sərrast atəşlə məhv ediblər, zirehli texnikasını sıradan çıxarıblar. Cəbhə bölgəsinin bütün rayonlarında ön xətdə hərbi xidmətini şərəflə yerinə yetiriblər.

Qarabağda 2023-cü ilin 19-20 sentyabr tarixlərində keşirilmiş lokal xarakterli antiterror əməliyyatlarında da çavuş Həzrətəli Əliyev fəal iştirak edib, terrorçuların tərksilah edilməsində silahdaşları ilə bərabər böyük şücaətlər göstərib.

Müharibə zəfərimizlə başa çatandan sonra xidmət etdiyi hərbi hissənin heyəti ilə birlikdə sülh şəraitinin qorunması, düşməndən geri alınmış torpaqların müdafiəsi və mühafizəsi məqsədilə bir müddət işğaldan azad edilmiş ərazilərdə yerləşiblər. Sonra mənsubu olduğu hərbi hissədə xidmətini davam etdirib.
Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin sərəncamına əsasən döyüşlərdə göstərdiyi şücaətlərə görə “Suqovuşanın azad olunmasına görə”, Azərbaycan Respublikasının Baş Nazirinin imzaladığı “Vətən müharibəsi iştirakçısı” medallarına layiq görülüb.
Hal-hazırda AR SQ “N” saylı hərbi hissəsində çavuş rütbəsində xidmətini davam etdirir.
Vətən müharibəsi veteranıdır.
Evlidir, övladları Fərid 10, Fəqan 4 yaşlarındadır.

Respublikanın Əməkdar jurnalisti, müharibə veteranı Əntiqə Qonağın "44 günlük savaşın 444 cəngavəri" adlı üçcildliyindən