3 mart – Ümumdünya Yazıçılar Günü, sözün, qələmin və düşüncənin bayramıdır. Bu gün yazıçıların qələmi yalnız kağız üzərində iz qoymur, həm də millətin yaddaşında, ruhunda və gələcəyində silinməz izlər buraxır. Yazıçı – zamanın şahidi, xalqın vicdanı, gənclərin yol bələdçisidir. Onun missiyası sadəcə hekayə danışmaq deyil, insanı düşündürmək, cəmiyyətə güzgü tutmaq, gənclərə yol göstərməkdir.

Mənim üçün çox əziz olan Əntiqə Qonaq, Ötərxan Eltac, Hikmət Məlikzadə və digər yazıçılarımızın əsərləri bu missiyanın canlı nümunəsidir. Onların yazıları bir tərəfdən milli kimliyi qoruyur, digər tərəfdən gənclərə Vətən sevgisini, azadlıq ruhunu, ədalət hissini aşılayır. Yazıçıların qələmi bir bayraq kimidir – dalğalananda millətin ruhunu oyadır, susanda isə xalqın yolunu qaranlıqda qoyur.

Bu bayram mənim qələmimin də bayramıdır. Bir yazıçı olaraq hər zaman çalışıram ki, yazılarımda dövlətimə, Vətənimə xidmət edim. Hər bir əsərimdə Vətənpərvərlik ruhunu yaşatmaq, gənclərə milli dəyərləri aşılamaq, xalqın gücünü və iradəsini sözlə ifadə etmək mənim üçün müqəddəs bir borcdur. Çünki yazıçı yalnız özünü deyil, bütöv bir milləti təmsil edir.

Söz – işıqdır, qaranlığı yarar.
Qələm – bayraqdır, milləti qaldırar.
Yazıçı – vicdanın səsi, xalqın ruhu, gənclərin ümididir.

Yazıçı yazmasa, xalq danışa bilməz; yazıçı susarsa, millətin səsi itib gedər. Bu səbəbdən yazıçıların əsərləri sadəcə ədəbi nümunə deyil, həm də milli ideologiyanın daşıyıcısıdır. Onlar gənclərə yalnız estetik zövq vermir, həm də düşüncə tərzi formalaşdırır, Vətənpərvərlik ruhunu möhkəmləndirir.

Ümumdünya Yazıçılar Günü münasibətilə bütün yazıçılarımıza uğurlar arzulayıram. Qələminiz daim haqqı yazsın, sözünüz daim millətə güc versin, əsərləriniz gənclərə yol işığı olsun. Mənim üçün əziz olan yazıçıların adları bu bayramda xüsusi dəyər daşıyır. Bu gün mənim üçün də bir bayramdır – çünki hər bir yazımda Vətənimə, dövlətimə, xalqıma xidmət etməyi özümə ən böyük şərəf sayıram.

Mövsümağa Ədalətoğlu
yazıçı-publisist