30 avqust 1981-ci ildə Quba rayonunun Xanəgah kəndində anadan olub.
1988-1999-cu illərdə Xaçmaz şəhəri, Abamüslüm Səlimov adına 7 saylı tam orta məktəbində on bir illik təhsil alıb.
1999-2003-cü illərdə Heydər Əliyev adına Azərbaycan Ali Hərbi Məktəbində motoatıcı ixtisası üzrə oxuyub və ali təhsil ocağını leytenant hərbi rütbəsi ilə bitirib.
2003-2004-cü illərdə Azərbaycan Respublikası Silahlı Qüvvələrinin Təlim Tədris Mərkəzində ixtisasartırma kursunda hərbi nəzəri biliklərini daha da zənginləşdirib.
2004 - cü ildə Gəncə şəhərindəki “N” saylı hərbi hissədə taqım komandiri kimi leytenant rütbəsində xidmətinə başlayıb. 2005-2008-ci illərdə Ağdam rayonundakı “N” saylı hərbi hissədə baş leytenant rütbəsində bölük komandiri vəzifəsində xidmətinə davam edib. 2008-2011-ci illərdə kapitan rütbəsində Beyləqanın Haramı düzündəki və Tərtərdəki “N” saylı hərbi hissələrdə tabor komandirinin maddi-texniki təminat üzrə müavini vəzifəsini icra edib. 2011-2016-cı illərdə Lənkərandakı “N” saylı hərbi hissədə mayor rütbəsində taborun qərargah rəisi vəzifəsində hərbi xidmətini davam etdirib.
Əşrəf Rəhimov 2016-cı ildən hərbi xidmətini Dövlət Sərhəd Xidmətində davam etdirib. DSX-nin Yevlaxdakı “N” saylı Çevik Hərəkat Qüvvələrində, daha sonra Xızı rayonundakı Çevik Hərəkat Qüvvələrində müvafiq vəzifələrdə hərbi xidmət edib.
Vətəninə sədaqətlə və vicdanla hərbi xidmət etdiyi o şərəfli illərdə leytenant (2003), baş leytenant (2006), kapitan (2009), mayor (2013), polkovnik-leytenant (2020) hərbi rütbələrinə layiq görülüb.
Qətiyyətli və peşəkar hərbçi, vətənpərvər insan Əşrəf Rəhimov 24 illik qüsursuz və nümunəvi xidmət illərində leytenant rütbəsindən polkovnik-leytenant rütbəsinədək yüksəlib.
2020-ci il sentyabr ayının 27-də Ermənistan silahlı qüvvələrinin beynəlxalq hüquq normalarını kobud surətdə pozaraq, müxtəlif növ silahlardan, o cümlədən ağır artilleriyalardan (iki həftə sonra düşmən tərəf dinc yaşayış məntəqələrimizə ballistik raketlərdən atəş açmağa başlayıb) istifadə etməklə bir neçə istiqamətdən Azərbaycan Respublikasına qarşı növbəti hərbi təxribatını və Silahlı Qüvvələrimizin əks-hücum əməliyyatlarına başladığını nəzərə alaraq o da DSX-nin Çevik Hərəkat Qüvvələrinin mənsubu kimi savaşın ilk günündən cəbhənin Füzuli rayonu istiqamətindən döyüşlərə atılıb. Cəbrayıl, Zəngilan, Qubadlı rayonlarının və kəndlərinin düşmən tapdağından azad edilməsində silahdaşları ilə birgə böyük qəhrəmanlıq nümunəsi göstəriblər.
Əşrəf Rəhimovun düşüncələri: “Bütün döyüş boyu bayrağı qəlbimdə daşımışam. Bayraq sevgim, bayraq eşqim bircə an olsun da məni tərk etməyib. Addım-addım irəlilədikcə elə bilirdim bayrağı bir az da irəliyə sancmışam. Əslində hər bir əsgər özü boyda bir bayraq idi. Çünki Zəfər günü azad edilmiş o torpaqlarda dalgalanan bayraqların hər ilməsində bir əsgərimizin rəşadət, qəhrəmanlıq yolu var. Böyük Zəfərimizə gedən o şanlı, şərəfli, qanlı-qadalı, ölümlü-qalımlı yol. Var olsun ordumuz, yaşasın doğma Azərbaycanımız. Şəhidlərimizə Allahdan rəhmət, qazilərimizə sağlamlıq arzulayıram.”
Müharibə zəfərimizlə başa çatandan sonra xidmət etdiyi hərbi hissənin heyəti ilə birlikdə sülh şəraitinin qorunması, düşməndən geri alınmış torpaqların müdafiəsi və mühafizəsi məqsədilə bir müddət - fevral ayınadək işğaldan azad edilmiş ərazilərdə yerləşiblər. Sonra mənsubu olduğu hərbi hissədə xidmətini davam etdirib.
7 yanvar 2022-ci ildə ordu sıralarından tərxis olunub.
25 illik qüsursuz hərbi xidmət illəri 9 medalla qiymətləndirilib.
Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin sərəncamına əsasən döyüşlərdə göstərdiyi şücaətlərə görə “Azərbaycan bayrağı” ordeni, “Zəngilanın azad olunmasına görə”, “Cəbrayılın azad olunmasına görə”, Azərbaycan Respublikasının Baş Nazirinin imzaladığı “Vətən müharibəsi iştirakçısı”, Azərbaycan Respublikasının Müdafiə Nazirinin müvafiq əmri ilə “Qüsursuz xidmətə görə” 3-cü dərəcəli, “Qüsursuz xidmətə görə” 2-ci dərəcəli, “Qüsursuz xidmətə görə” 1-ci dərəcəli medalları, “Azərbaycan Respublikası Silahlı Qüvvələrinin 90 illiyi (1918-2008)”, “Azərbaycan Respublikası Silahlı Qüvvələrinin 95 illiyi (1918-2013)” yubiley medalları ilə mükafatlandırılıb.
Hal-hazırda Xaçmaz rayonu, akademik Zərifə Əliyeva adına məktəb-liseyində Hərbi hazırlıq müəllimi vəzifəsində çalışır.
Azərbaycan Respublikası Silahlı Qüvvələrinin veteranıdır.
Evlidir, övladları Nurlan 14, Fidan 12 yaşlarındadır.
Respublikanın Əməkdar jurnalisti, müharibə veteranı Əntiqə Qonağın "44 günlük savaşın 444 cəngavəri" adlı üçcildliyindən