Azərbaycanın vətənpərvər, ləyaqətli və cəsur oğullarından söhbət düşəndə Xocalı soyqırımı zamanı şəhid olmuş Füzuli Salah oğlu Rüstəmovun da adı hörmətlə yad edilir. Füzuli 1965-ci il dekabrın 25-də Tərtər rayonunun Hüsənli kəndində doğulub. Uşaq yaşlarında ikən hər iki valideynini itirib.O, yeganə bacısı Fiqurə ilə birlikdə Xocalıya köçüb və xalası Səkinənin himayəsində böyüyüb. Füzuli dəliqanlı bir gənc olaraq Xocalıda ad çıxarmışdı: o, həmyaşıdları ilə Xocalının müdafiəsində dayanırdı.
Xocalı soyqırımı zamanı dinc əhalinin çıxarılması üçün əlindən gələni əsirgəməyən igid döyüşçü düşmən tərəfindən açılan atəş nəticəsində ağır yaralandı. Füzulini xilas etmək mümkün olmadı. O, şəhidlik zirvəsinə ucaldı.Onun meyidini doğulduğu Tərtər rayonunun Hüsənli kəndində torpağa tapşırdılar. Dövlət Başçısının 25 fevral 1997-ci il tarixli Sərəncamına əsasən Füzuli Rüstəmova Azərbaycanın Milli Qəhrəmanı adı verildi (ölümündən sonra).Füzuli subay idi.
Yaşasaydı, 2025-ci il dekabrın 25-i 60 illik yubileyi qeyd olunacaqdı.Hazırda Tərtər rayonundakı küçələrdən birinə Azərbaycanın Milli Qəhrəmanı, şəhid Füzuli Rüstəmovun adı verilib.
"Xocalı Soyqırımını Tanıtma" ictimai birliyinin və 2 nömrəli Bakı Baza Tibb Kollecinin birgə təşkilatçılığı ilə şəhid Füzuli Rüstəmovun xatirəsinə həsr edilən yubiley mərasimi keçirildi. Mərasimi 2 nömrəli Bakı Baza Tibb Kollecinin direktoru Dilarə Məmmədəliyeva açdı. Azərbaycan Respublikasının Dövlət Himni səsləndirildi, şəhidlərin xatirəsi 1 dəq. sükutla yad edildi.
"Xocalı Soyqırımını Tanıtma" ictimai birliyinin sədri, jurnalist Şamil Sabiroğlu tədbir iştirakçılarını salamladı, Füzuli Rüstəmovun şərəfli ömür yolu barədə qısa məlumat verdi. Ş.Sabiroğlu 2026-cı il fevralın 26-da Xocalı Soyqırımı Memorial Kompleksinin açılışı zamanı Prezident İlham Əliyev geniş və əhatəli çıxışını qeyd etdi. O, bildirdi ki, Dövlət Başçısının tapşırığına əsasən Memorial Kompleksə 10 ha. yer ayrılıb. Bu, o deməkdir ki Azərbaycanın Dövlət Başçısı Xocalı soyqırımı qurbanlarının əziz xatirələrinin yad edilməsi üçün var qüvvə ilə çalışır.
Azərbaycan Tibb Universiteti İnsan Anatomiyası və Tibbi Terminologiya Kafedrasının Professoru, Tibb elmləri doktoru Mübariz Allahverdiyev, yazıçı-publisist Nəzirməmməd Zöhrablı, "Xocalı Soyqırımını Tanıtma" ictimai birliyinin Ağsaqqallar Şurasının sədr müavini, müharibə veteranı Çingiz Bayramov, Azərbaycan Respublikasının Əməkdar artisti, Professor Ağalar Bayramov şəhid Füzuli Rüstəmov kimi ər oğulların tanıdılmasından ötrü var qüvvə ilə çalışmağa hazır olduqlarını bəyan etdilər.
Bədii qiraət ustası Ağalar Bayramov, 2 nömrəli Bakı Baza Tibb Kollecinin "Məlhəm" şeir qrupu və Azərbaycan Respublikası Dövlət Gömrük Komitəsi Akademiyasının tələbələri maraqlı ədəbi -bədii kompozisiya ilə çıxış etdilər. İstedadlı müğənnilər - İslam Ələsgərli və Sənani Səfərli Azərbaycana həsr edilən mahnıları ifa etdilər.
Mərasimin sonunda xatirə şəkilləri çəkildi.

Mövsümağa Ədalətoğlu,
44gunsavash.az saytının baş redaktoru, yazıçı - publisist.
28.02.2026.