Tanınmış şair - jurnalist Mahir Cavadlı 1959 - cu ildə Zəngilan şəhərində doğulub. Bakı Dövlət Universitetinin Jurnalistika fakültəsini bitirib. Orta məktəbdə oxuyarkən yazdığı satirik şeirlərlə pedaqoji kollektivin diqqətini cəlb edib. Mahir müəllim 1988-ci ildən etibarən dövrü mətbuatda çalışmağa başlayıb. 1992-ci ilin əvvəllərində Dövlət Sərhəd Xidmətinin nəzdində fəaliyyət göstərən "Sərhəd" qəzetinin məsul katibi kimi fəaliyyət göstərib. Daha sonra Azərbaycan Milli Təhlükəsizlik Nazirliyinin (MTN) Mətbuat Xidmətində hərbi xidmətə çağırılıb. Polkovnik rütbəsində ehtiyata buraxılıb. Müharibə veteranıdır. 9 kitabın müəllifidir.Hazırda Azərbaycan MEA Folklor İnstitutunda elmi işçi olaraq çalışır.
Mahir müəllimin sayca 9-cu kitabı "Hökumə" adlanır. Kitab müəllifin qələmə aldığı eyni adlı poema əsasında çap edilib. Kitabın redaktoru Əməkdar Mədəniyyət işçisi, şair - publisist Vaqif Bəhmənli, ön sözün müəllifi Əməkdar jurnalist Zemfira Məhərrəmlidir.
Dekabrın 26-da Azərbaycan Yazıçılar Birliyinin "Natəvan" Klubunda həmin kitabın təqdimat mərasimi keçirildi. Mərasimi AYB-nin katibi Səlim Babulla oğlu açdı.Ölkəmizin ərazi bütövlüyünün bərpası uğrunda gedən döyüşlər zamanı şəhid olan soydaşlarımızın xatirəsi 1 dəq. sükutla yad edildi. Yazıçı Əli Azəri, jurnalistlər - Zemfira Məhərrəmli, Qulu Ağsəs, Şamil Sabiroğlu, EA Folklor İnstitutunun əməkdaşı Şakir Albalıyev, "Yeni Təfəkkür" qəzetinin baş redaktoru, Əməkdar jurnalist Şəmsiyyə Musa qızı, Azərbaycan Radiosunun əməkdaşı, jurnalist, şair - publisist Ötərxan Eltac, şair Lalə İsmayıl, Fəridə Mirişli, Esmira Rəhimli və başqaları çıxış edərək 2024-cü il dekabrın 25-də "Azal" Avia Şirkətinə məxsus sərnişin təyyarəsinə Rusiya ərazisində silahlı müdaxilə zamanı pilotların, həmçinin, heyət üzvlərinin fədakarlığından danışdılar. "Hökumə" poemasını yazdığına görə Mahir müəllimə təşəkkür etdilər.
Mahir Cavadlı və qardaşı- jurnalist Salam Cavadlı qiymətli vaxtını sərf edərək təqdimat mərasiminə gələn hər bir şəxsə öz təşəkkürlərini bildirdilər.
Tədbirin sonunda xatirə şəkilləri çəkildi.

Şamil Sabir oğlu,
Mövsümağa Ədalət oğlu.
27.12.2025.