Sizin reklam burada
Araz danışır
Mən çayam.
Məni iki yerə bölüblər —
amma su iki olmur.
Məni xəritəyə çəkdilər,
xətkeşlə ölçdülər,
adımı sərhəd qoydular.
Mən isə axdım.
Çünki su dayansa
öz səsini itirər.
Bir sahilimdə analar
oğul adlarını suya deyir,
mən o adları aparmıram,
ürəyimdə saxlayıram.
O biri sahildə
uşaqlar “o tay” sözünü öyrənir,
amma baxışlarında
həmişə “biz” böyüyür.
Mən çox şey görmüşəm.
Görmüşəm ki,
sərhədlər torpaqdan əvvəl
insanın içinə çəkilir.
Amma bilirəm —
insanın içində divar tikən
yenə insanın özüdür,
və onu sökən də.
Hər gecə iki sahil
suyuma baxır.
Onlar elə bilir ayrıdırlar.
Mən isə görürəm —
eyni ay
hər iki tərəfdə doğur.
Bir gün
insanlar da su kimi olacaq.
Sakit,
sərhədsiz,
bir-birinə qarışmaqdan qorxmayan.
O gün
mən çay olmayacağam artıq.
Sadəcə
qovuşan yol olacağam.
XANIM XATUN/ 05.03.2026
.jpg)
