BRİKS-in (Braziliya, Rusiya, Hindistan, Çin və Cənubi Afrika Respublikası) verdiyi fürsətə əsasən, İranla Rusiya arasında bütün maliyyə əməliyyatları ABŞ dolları olmadan həyata keçirilir.

Bunu İran parlamentinin sədri Məhəmməd Baqer Qalibaf “Russia today” telekanalına müsahibəsində bildirib.

O, İranla Rusiya arasında dərin əlaqələrin mövcud olduğunu da vurğulayıb: “Bizim ümumi maraqlarımız və eyni zamanda ortaq düşmənlərimiz var”.

M.B.Qalibaf BRİKS-ə üzv dövlətlərin parlament sədrlərinin Rusiyada keçirilən toplantısında iştirak edib. İki ölkə arasındakı münasibətdən danışan parlament sədri daha sonra bildirib: “Rusiyaya səfərim zamanı ölkəmin ali rəhbəri ayətullah Xaməneinin yazılı müraciətini Rusiya Prezidenti Vladimir Putinə çatdırdım. Bizim iki ölkə arasında çox əhatəli uzunmüddətli sazişimiz var. Bu müqavilə müxtəlif sosial, mədəni, siyasi, təhlükəsizlik və müdafiə sahələrini əhatə edir”.