Ukraynanın Zakarpatye vilayətinin Vışkovo qəsəbəsində atışma olub, 3 nəfər ölüb.

Bu barədə Ukrayna Milli Polisi məlumat yayıb.

Məlumata görə, daha əvvəl keşiş kimi xidmət etmiş 45 yaşlı şəxs əvvəlcə yerli sakinin həyətinə daxil olaraq ev sahibi və onun həyat yoldaşına bir neçə dəfə atəş açıb. O, daha sonra küçəyə çıxaraq yoldan keçənlərə atəş açıb.

Atışma nəticəsində 3 nəfər ölüb, 2 nəfər isə xəsarət alıb.

Polis xüsusi əməliyyat keçirərək şübhəlini saxlayıb. Hadisənin mümkün motivləri arasında məişət münaqişəsi və xuliqanlıq versiyaları araşdırılır.

Axtarışlar zamanı onun yaşadığı evdə və xidmət etdiyi kilsənin ərazisində qeydiyyatsız ov tüfəngi, tapança və patronlar, həmçinin ilkin olaraq çətənə olduğu ehtimal edilən maddə aşkarlanıb.