“Azərbaycan Respublikasının Ədliyyə Nazirliyində dövlət icra məmurlarının qulluğa qəbulu ilə bağlı müsabiqənin və icbari təlimin keçirilməsi Qaydası” təsdiq edilib.

Nazirlər Kabineti bu barədə qərar verib.

Müsabiqə test imtahanından və söhbət mərhələsindən ibarətdir. Müsabiqəyə qanunla müəyyən edilmiş tələblərə cavab verən ali təhsilli şəxslər buraxılırlar.

Prokurorluqda və digər hüquq mühafizə orqanlarında xüsusi və ya hərbi rütbə nəzərdə tutulan vəzifələrdə işləyən şəxslər, digər dövlət orqanlarında dövlət qulluğu keçən inzibati vəzifələri tutan şəxslər, hüquq sahəsində elmlər doktoru elmi dərəcəsi olan şəxslər və əvvəllər hakim işləmiş şəxslər müsabiqənin imtahan mərhələsindən azad edilirlər.

Müsabiqənin keçirilməsi və icbari təlim başa çatdıqdan sonra namizədlərin təyinatına dair təkliflərin verilməsi yaradılmış komissiya tərəfindən həyata keçirilir. Naxçıvan Muxtar Respublikasının ərazisində icra məmuru vəzifəsi üzrə qulluğa qəbul bu Qaydaya uyğun olaraq Naxçıvan Muxtar Respublikasının Ədliyyə Nazirliyi tərəfindən həyata keçirilir.


İmtahan 3 saat müddətində fasilə verilmədən keçirilir. İmtahanda icra məmurunun fəaliyyətində tətbiq olunan normativ hüquqi aktlara dair hər bir sualın düzgün cavabı 1 (bir) balla (cəmi 60 mümkün bal), namizədin məntiqi nəticələr çıxarmaq qabiliyyətini, ümumi bilik səviyyəsini, dünyagörüşünü və ünsiyyət bacarıqlarını müəyyən edən hər bir sualın düzgün cavabı 0,5 balla (cəmi 20 mümkün bal) qiymətləndirilir. Səhv cavablar və ya sualın cavabsız qoyulması “0” bala bərabər tutulur və düzgün cavablara təsir göstərmir. İmtahanda 55 və daha çox bal toplamış namizədlər söhbət mərhələsinə buraxılırlar.

Söhbət fərdi qaydada və 30 (otuz) dəqiqəyədək aparılır. Söhbət zamanı hər namizədə 5 (beş) sual verilir və namizədin aşağıdakı xüsusiyyətləri qiymətləndirilir:

- icra məmurunun fəaliyyətini tənzimləyən normativ hüquqi aktları tətbiq etmək sahəsində bilik və bacarığı, o cümlədən təhsil səviyyəsi, peşə nailiyyətləri, xarici dilləri bilməsi, kompüterdə işləmək bacarığı və səviyyəsi;

- özünü təqdimetmə bacarığı, ümumi dünyagörüşü, ünsiyyət bacarığı, təmkinliliyi, fikir və rəyini ifadə etmək qabiliyyəti;

- analitik düşünmək qabiliyyəti, hadisələri obyektiv qiymətləndirmək və problemlərin həlli ilə bağlı qərar çıxarmaq bacarığı və səviyyəsi.

Söhbət zamanı namizədin verdiyi hər cavab komissiyanın hər bir üzvü tərəfindən 0, 1, 2, 3, 4 və 5 ballardan biri ilə qiymətləndirilir və komissiya üzvlərinin verdiyi qiymətlər toplanaraq söhbətdə iştirak edən komissiya üzvlərinin sayına bölünür. Söhbətin nəticəsi üzrə ən çox 25 bal toplamaq mümkündür. Komissiya üzvləri arasında söhbətlə bağlı fikir mübadiləsi aparıla bilər.

Suallar və cavablar komissiyanın üzvləri tərəfindən bal cədvəlinə yazılır və qiymətləndirilərək komissiyanın sədrinə təqdim edilir. Söhbətin nəticələri üzrə namizəd 15 və daha çox bal topladıqda söhbət mərhələsindən müvəffəqiyyətlə keçmiş hesab olunur.

Müsabiqədən uğurla keçmiş namizədlər icra məmuru qismində fəaliyyət göstərmək üçün Nazirliyin Ədliyyə Akademiyasında azı 3 (üç) aylıq icbari təlimə cəlb edilirlər. İcbari təlimin yekun qiymətləndirməsindən müvəffəqiyyətlə keçmiş namizədlər müsabiqə və icbari təlimin yekunları üzrə topladıqları ümumi bala əsasən sıralanırlar. Namizədlər həmin sıralamaya əsasən vakant icra məmuru vəzifəsinə təyin edilmək üçün ədliyyə nazirinə təqdim olunurlar. Toplanmış balların miqdarı eyni olduqda, ardıcıl olaraq elmi dərəcəsi olanlara, ali təhsil pilləsinin daha yüksək səviyyəsini bitirənlərə, təhsil səviyyəsi eyni olduqda isə təhsil müəssisəsini fərqlənmə ilə bitirənlərə və xarici dil bilənlərə üstünlük verilir.