8 Noyabr - Zəfər Günü Təbriki

Bu gün - tariximizin ən şanlı, millətimizin ən qürurlu günü olan 8 Noyabr Zəfər Gününün şərəfinə Cənab Ali Baş Komandan, Azərbaycan Respublikasının Prezidenti İlham Əliyevi, Azərbaycan dövlətini, xalqımızı və bütün dünya Azərbaycanlılarını böyük qürur və dərin ehtiramla təbrik edir, bu tarixi Zəfərə görə Sizə sonsuz minnətdarlığımızı bildiririk!

Bu Zəfər təsadüf deyildi. Bu, illərlə qurulan dövlətin, güclənən ordunun, birləşən xalqın və qətiyyətli liderliyin məntiqi nəticəsi idi. Azərbaycan 30 il səbr etdi, haqqını danışıqlar masasında axtardı, beynəlxalq hüquqa sadiq qaldı. Amma haqq verilməyəndə, onu almaq lazım gəldi. Və Azərbaycan xalqı haqqını döyüş meydanında, öz qanı, öz canı, öz iradəsi ilə aldı.

44 gün davam edən Vətən müharibəsi bunu bütün dünyaya göstərdi: güclü dövlət olmadan ədalət olmur, güclü ordu olmadan torpaq qorunmur, birlik olmadan qələbə qazanılmır. Bizim qələbəmizin arxasında məhz bu üç güc dayanırdı - dövlət, ordu və xalq birliyi. Ali Baş Komandanın siyasi iradəsi bu birliyi bir yumruğa çevirdi, ordumuzun peşəkarlığı bu iradəni qələbəyə döndərdi, xalqımızın dəstəyi isə bu qələbəni tarixi zəfərə çevirdi.

Şuşanın azad olunması bu müharibənin dönüş nöqtəsi oldu. Çünki Şuşa təkcə strateji yüksəklik deyildi, Şuşa milli kimliyimizin simvolu idi. Şuşanı azad edən millət sübut etdi ki, o, keçmişinə sahib çıxmağı, gələcəyini özü qurmağı bacarır.

Bu gün biz Zəfəri qeyd edərkən, onun qiymətini də unutmuruq. Bu qələbə şəhidlərimizin canı, qazilərimizin sağlamlığı, analarımızın göz yaşı bahasına qazanıldı. Ona görə də bu Zəfər bizim üçün təkcə bayram deyil, həm də böyük məsuliyyətdir. Biz bu məsuliyyəti dərk edirik: azad olunmuş torpaqları yenidən qurmaq, Qarabağı abad etmək, şəhid ailələrinə və qazilərimizə sahib çıxmaq, gələcək nəsillərə bütöv və güclü Azərbaycanı təhvil vermək.

Tanrıdan şəhidlərimizə rəhmət, qazilərimizə şəfa diləyirik!
Qələbəmiz əbədi olsun! Bayrağımız daima zirvələrdə dalğalansın!
Biz inanırıq ki, Zəfərlə başlayan bu yol Azərbaycanı daha da güclü, daha da qüdrətli, daha da uca edəcək. Çünki bu millət bir dəfə qalib gəlməyi bacardısa, bir daha heç vaxt məğlub olmayacaq!

Eşq olsun Azərbaycan xalqına! Eşq olsun Azərbaycan Ordusuna! Eşq olsun Ali Baş Komandanımıza! Yaşasın Müzəffər Azərbaycan! Yaşasın qalib xalq!

44GUNSAVASH.az saytının Baş Redaktoru
AJB-nin üzvü
yazıçı-publisist
Mövsümağa Ədalətoğlu