Azərbaycan Respublikası Milli Məclisinin deputatı, Türk Dövlətləri Təşkilatına (TDT) üzv ölkələrin QHT Platformasının Baş katibi Azər Allahverənov Türkiyə Respublikasından olan nümayəndə heyəti ilə görüş keçirib.
Görüşdə Türkiyə Respublikasını təmsil edən DASAM-ın sədri Mehmet Gökhan Özçubukçu, Türk Dünyası Yörük Türkmenlər Birliyinin baş katibi Cemal Akkuş və Alternativ Araşdırmalar Mərkəzinin nümayəndəsi Necmettin Özdemir iştirak ediblər.
Azərbaycan Milli QHT Forumunun ofisində baş tutan görüşdə Azər Allahverənov Türk Dövlətləri Təşkilatına üzv ölkələrin QHT Platformasının fəaliyyəti, qarşıya qoyulan məqsədlər və həyata keçirilən layihələr barədə ətraflı məlumat verib. O, vətəndaş cəmiyyəti institutları arasında əlaqələrin sistemli şəkildə inkişaf etdirilməsinin, qarşılıqlı təcrübə və bilik mübadiləsinin genişləndirilməsinin, eləcə də ortaq təşəbbüslərin vahid yanaşma əsasında əlaqələndirilməsinin əhəmiyyətini vurğulayıb.
Türk Dünyası Yörük Türkmenlər Birliyinin baş katibi Cemal Akkuş da Türkiyədə vətəndaş cəmiyyəti sahəsində həyata keçirilən fəaliyyətlər, həmçinin Türk dünyası həmrəyliyi istiqamətində görülən işlər, gələcək planlar barədə fikirlərini bölüşüb.
Görüşdə qeyd olunub ki, Türk dünyasında QHT-lər arasında institusional əməkdaşlığın gücləndirilməsi, birgə layihələrin və çoxtərəfli təşəbbüslərin artırılması xalqlar arasında əlaqələrin daha da dərinləşməsinə, qarşılıqlı etimadın möhkəmlənməsinə və ictimai diplomatiyanın inkişafına mühüm töhfə verə bilər. Bu istiqamətdə vətəndaş cəmiyyəti institutlarının imkanlarından daha səmərəli istifadə olunmasının vacibliyi diqqətə çatdırılıb.