Dekabrın 24-ü — Azərbaycan xalqının yaddaşına qızıl hərflərlə həkk olunmuş bir tarixdir. Bu gün, yalnız bir ömrün başlanğıcı deyil, həm də bir millətin taleyini dəyişən, tarixə yön verən Liderin — Azərbaycan Respublikasının Prezidenti, Silahlı Qüvvələrin Ali Baş Komandanı, Zəfər Sərkərdəsi Cənab İlham Əliyevin doğum günüdür.

Tarixdə elə anlar var ki, zamanın axarında silinməz izlər buraxır. Elə şəxsiyyətlər var ki, onların adı sadəcə bir dövrün deyil, bütöv bir millətin yaddaşına çevrilir. Cənab İlham Əliyev məhz belə bir şəxsiyyətdir — xalqın iradəsini öz qətiyyəti ilə birləşdirərək, əsrlərin həsrətinə son qoyan, ədaləti bərpa edən, milli ruhu dirçəldən Lider.

Qarabağ — minilliklərin beşiyi, mədəniyyətimizin tacı, xalqımızın qəlbində əbədi yaşayan Vətən parçası. Bu torpaqların azadlığı uğrunda aparılan mübarizə yalnız hərbi zəfər deyildi — bu, həm də mənəviyyatın, milli kimliyin, tarixi ədalətin bərpası idi. Bu müqəddəs missiyanın başında dayanan, xalqın inamını öz iradəsinə çevirən, diplomatik uzaqgörənliyi və siyasi qətiyyəti ilə dünya miqyasında nümunə göstərilən bir Lider — Cənab Prezident İlham Əliyev oldu.

Sizin rəhbərliyinizlə Azərbaycan yalnız torpaqlarını deyil, həm də milli ləyaqətini, suverenliyini və gələcəyə olan inamını geri qazandı. Böyük Qayıdış — sadəcə fiziki bir dönüş deyil, həm də mənəvi bir dirçəlişdir. Uzun illər doğma yurd həsrəti ilə yaşayan yüz minlərlə soydaşımızın arzusu artıq gerçəyə çevrilib. Qarabağa qayıdan insanların gözlərindəki sevinc, doğma torpaqlarda qurulan yeni həyat, yüksələn şəhərlər və abadlaşan kəndlər — bütün bunlar Sizin illərlə apardığınız müdrik siyasətin, yorulmaz fəaliyyətinizin və xalqınıza olan sonsuz sevginizin bəhrəsidir.

Cənab Prezident, bu əlamətdar gün münasibətilə Sizi səmimi qəlbdən təbrik edir, Sizə möhkəm can sağlığı, tükənməz enerji və xalqımıza xidmət yolunda yeni-yeni uğurlar arzulayırıq. Sizin Liderliyinizlə Azərbaycan daha da yüksələcək, daha da güclənəcək, daha da işıqlı sabahlara doğru irəliləyəcək.

Siz zamanın sınağından alnıaçıq çıxan Lider, xalqın qəlbində taxt quran Sərkərdə, tarixə iz qoyan şəxsiyyətsiniz. Doğum gününüz mübarək olsun, Cənab Prezident!

Mövsümağa Ədalətoğlu
Yazıçı - publisist