Vətən – bu müqəddəs kəlmə hər bir azərbaycanlının qəlbində müqəddəs bir and kimi yaşayır. Bu torpağın hər qarışı, hər daşı, hər zərrəsi şəhid qanı ilə yoğrulmuş, igid oğulların cəsarəti ilə qorunmuşdur. Bu igidlərdən biri də Həsənov Mahir Babayar oğludur – ömrünü Vətənə xidmətə həsr etmiş, səngərlərdə böyümüş, dağlarda qocalmış, lakin ruhu daim gənc və döyüşkən qalmış bir qəhrəmandır.

1993-cü ilin avqust ayında hərbi xidmətə başlayan Mahir Həsənov, 2015-ci ilin noyabr ayına qədər – düz 22 il boyunca ön cəbhədə, Vətənin ən qaynar nöqtələrində xidmət etmişdir. O, sadəcə bir əsgər deyil, əsl vətənpərvər, əsgərlərinə ata, qardaş, dost olmuş bir komandir idi. Palkovnik-leytenant rütbəsi ilə təxris olunan Mahir Həsənov, bu illər ərzində təkcə hərbi xidmətini deyil, həm də mənəvi borcunu yerinə yetirmişdir – Vətənin keşiyində dayanaraq, onun hər qarış torpağını canı bahasına qorumuşdur.

Onun xidmətləri dövlət tərəfindən də yüksək qiymətləndirilmişdir. Azərbaycan Respublikası Prezidentinin adından, Müdafiə Nazirinin əmri ilə bir sıra medallarla –
- “Qüsursuz xidmətə görə” 3-cü dərəcəli medal
- “Qüsursuz xidmətə görə” 2-ci dərəcəli medal
- “Qüsursuz xidmətə görə” 1-ci dərəcəli medal
- Silahlı Qüvvələrin 10, 90 və 95 illik yubiley medalları
ilə təltif olunmuş, həmçinin çoxsaylı Fəxri Fərmanlara layiq görülmüşdür. Bu təltiflər onun fədakarlığının, peşəkarlığının və Vətənə sədaqətinin rəmzidir.

Təxris olunduqdan sonra belə, Mahir Həsənov Vətənə olan borcunu bitmiş saymamışdır. 2020-ci ilin 44 günlük Vətən müharibəsində könüllü olaraq ön cəbhəyə yollanmış, bir daha sübut etmişdir ki, Vətən sevgisi nə rütbə tanıyır, nə yaş. O, yenidən səngərlərə qayıdaraq, gənc əsgərlərlə çiyin-çiyinə döyüşmüş, onlara ruh verərək, əsl qəhrəmanlıq nümunəsi göstərmişdir.

Mahir Həsənovun həyat fəlsəfəsi sadə, lakin dərin mənalıdır: “Vətəni sevməyən ailəsini də sevə bilməz.” Bu sözlər onun həyatının, amalının və əqidəsinin təcəssümüdür. O, öz canını Vətənə sipər etməklə yanaşı, ailəsində də vətənpərvərlik ruhunu yaşatmış, oğlu Hikmətə körpə yaşlarından bu müqəddəs sevgini aşılamışdır. Bu gün Hikmət atasının yolunu davam etdirərək, Vətənin keşiyində dayanır, doğma torpaqlarını qürurla qoruyur.

Mahir Həsənovun həyat yolu – səngərlərdə keçən gənclik illəri, şaxtada, boranda əsgərləri ilə bölüşdüyü çörək, gecə-gündüz demədən qoruduğu sərhədlər – bir qəhrəmanlıq dastanıdır. O, təkcə silahı ilə deyil, ürəyi ilə də döyüşmüş, əsgərlərinə komandir yox, qardaş olmuşdur. Çünki o bilirdi ki, Vətəni sevən insan, onun vətəndaşını da sevməlidir.

Salyan torpağında dünyaya göz açan Mahir Həsənov, bu torpağın ruhunu, nəfəsini, sədaqətini özündə daşıyır. Onun ömrü, bir öyüd-nəsihət kitabı kimi gələcək nəsillərə örnəkdir. O, sübut etdi ki, Vətən sevgisi sadəcə sözlə deyil, əməllə göstərilməlidir. Və bu əməllər tarixə yazılır, yaddaşlarda əbədi qalır.

Bəziləri Vətəni sevir, bəziləri isə Vətən olur. Mahir Həsənov Vətənin özü kimi yaşadı.
Onun addımları torpağın yaddaşına həkk olundu, nəfəsi dağların zirvəsində, səngərlərin sükutunda yaşayır.
O, təkcə bir ömür yaşamadı – o, bir millətin qürur salnaməsinə çevrildi.
Hər səhər günəş doğanda, onun kimi igidlərin ruhu bu torpaqlarda yenidən doğulur.
Çünki Vətən, onu sevənlərin nəfəsi ilə nəfəs alır.

Bu gün biz Mahir Həsənov kimi igidlərin sayəsində azad və müstəqil bir ölkədə yaşayırıq. Onların fədakarlığı, sədaqəti və qəhrəmanlığı bizim milli kimliyimizin, dövlətçiliyimizin təməlidir. Mahir Həsənovun adı, onun kimi igidlərin adı, Azərbaycan tarixində qızıl hərflərlə yazılmışdır. Onlar bizim qürurumuz, iftixarımız, gələcək nəsillərə örnək olan əsl Vətən oğullarıdır.

Vətən – bir ömürlük sevgidir. Mahir Həsənov isə bu sevginin canlı təcəssümüdür.

Mövsümağa Ədalətoğlu
Yazıçı,publisist