Xəbər verdiyimiz kimi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) öz işini uğurla davam etdirir. Tədbirə dünyanın müxtəlif ölkələrindən onminlərlə qonaq qatılıb.

COP29-da iştirak edən tanınmış simalardan biri də dünya şöhrətli fotoqraf Rza Deqatidir.

Tanınmış fotoqraf konfransla bağlı düşüncələrini Bizim.Media ilə bölüşüb.

Rza Deqati ilə müsahibəni təqdim edirik:

- Rza bəy, konfransla bağlı ilkin təəssüratınız necədir?

- COP29 çox mötəbər tədbirdir. Bütün dünyanın gözü hazırda Azərbaycandadır. 190-dan artıq ölkənin nümayəndəsi COP29 tədbirlərinə qatılıb. Yəni elə bir dövlət yoxdur ki, Azərbaycanda keçirilən bu tədbirin kənarında qalsın. Mən bir çox COP tədbirlərində iştirak etmişəm, onları araşdırmışam. Amma COP29-a olan marağı heç birində görməmişəm. Hər bir insan sanki COP29-a töhfə vermək və yaxud ondan bəhrələnmək istəyir. Bu da ondan irəli gəlir ki, artıq bütün dünya bilir və görür ki, Azərbaycan danışmır, iş görür.

- Siz həm birinci, həm də ki, ikinci Qarabağ savaşının canlı şahidi olub, gördüyünüz mənzərələri lentə almısınız. Sizcə, 30 illik işğal dövründə Ermənistan Azərbaycan təbiətinə və iqliminə nə qədər ziyan vurub?

- Mən 43 illik iş həyatımda çox müharibələr görmüşəm. Amma gördüyüm hərbi savaşların nəticələri iqlim dəyişkənliyinin yaratdığı faciələr fonunda çox kiçik görünür. Dünyanın hər yerində bu gün hərbi savaş yoxdur. Amma bu gün dünyanın hər yerində iqlim dəyişkənliyinin yaratdığı fəsadlardan insanlar ölür. Bu da o deməkdir ki, iqlim dəyişkənliyi ən qorxunc müharibədir.

Mən Azərbaycanın işğaldan azad olunmuş ərazilərini qarış-qarış gəzmişəm. Ermənistanın Azərbaycan təbiətinə vurduğu dəhşətli zərbəni sözlə ifadə etmək olmur. İşğal dövründə Ermənistan Azərbaycanın yeraltı və yerüstü sərvətlərini təkcə talamayıb, həm də təbiətini məhv edib. Bununla da ermənilər təkcə Azərbaycanda yox, həm də regionda iqlim dəyişikliyinə öz “töhfələrini veriblər”. Ona görə də bir çox ölkələr kimi Azərbaycan da bu gün təbii fəlakətlərlə, anomal istilərlə üz-üzə qalıb.

- Amma Ermənistan Azərbaycan təbiətinə zərər vurmaq üçün bu gün də əlindən gələni edir...

- Bəli, Ermənistan Araz çayını çirkləndirməkdə davam edir. Bu çaya hətta radioaktiv maddələr axıdılır. Bu da təkcə insanları deyil, həm də təbiəti məhv edir.

- Bəlkə elə bu cinayətlərdən gizlənmək üçün Ermənistan rəsmiləri COP29 tədbirlərinə qatılmayıb?

- COP29 elə bir tədbirdir ki, onun sahibi yoxdur. Ora bütün düşmən dövlətlərin təmsilçiləri də qatılır. Məsələn, COP29-a qatılan dövlətlərin hamısı bir-birləri ilə dost deyillər. Ona görə də həm Ermənistanın, həm də Fransanın bu tədbirə qatılmamasının çox səbəbləri var. Biri də siz deyən səbəbdir...

Bizim.Media