Artıq qürur hissi ilə deyə bilərik ki, xalqımız milli dövlət quruculuğu işində ümdə əsaslar tətbiq edir; vətəndaşlıq duyğumuz, millətə, dövlətə, vətənə sevgi hissimiz bizə tarixə söykənmək və gələcəyə gedən yolu daha möhkəm, daha dərin əsaslar üzərində qurmaq gücü verir.

Bu, torpaqlarımızın işğaldan tam azad edilməsi, müzəffər Azərbaycan ordusunun qazandığı nailiyyətlər üçün bir səbəbdir. Məhz 27 sentyabr 2020-ci ildə başlanan əks hücum əməliyyatı - Vətən müharibəsi, Qarabağda əldə etdiyimiz nailiyyətlər, hazırkı uğurlar bu prosesin bir təzahürüdür. 2020-ci ilin 8 noyabrında əldə etdiyimiz Zəfər ölkə Prezidentinin yüksək bacarığı, siyasi ideya mənbəyi, Milli Ordumuzun möhtəşəm səfərbəredici səyidir.

30 ilə yaxın idi canında, qanında Vətən sevdası tüğyan edən hər kəs işğal altındakı torpaqlarımıza ağı deyir, bir gün bu acıların bitəcəyinə inanırdı. Xalqımızın yetişdirdiyi qəhrəman oğullar öz şərəfli ölümləri ilə tarix yazdılar, 8 noyabrda müharibə başa çatdı. Ali Baş Komandan İlham Əliyev ümummilli lider Heydər Əliyevin məzarı üstündə nitq söyləyərkən dedi: “Xoşbəxt adamam ki, ata vəsiyyətini yerinə yetirdim...”. Bu, odlu sözlər ölkəmizin düşmən ölkələr üzərində qazandığı tarixi qələbə üçün yazılmış möhtəşəm himn idi...
Artıq dörd ildir ki, Azərbaycan xalqı erməni faşizmi üzərində qələbənin 4-cü ilini şərəflə qey edir, Vətən uğrunda canlarından keçmiş qəhrəman oğulların xatirələrini dərin ehtiramla yad edir.

Xalqımızı Zəfərimizin 4-cü ili münasibətilə təbrik edir, bütün şəhidlərimizə Allahdan rəhmət diləyirik.

Abasov Mövsümağa
AJB-nin üzvü, 44 Gunsavash.az
Saytının Təsisçisi və Baş redaktoru.