Azərbaycan və Türkiyə arasında işğaldan azad olunmuş ərazilərdə istehsal olunan məhsullar üçün emalı sənayesinin yaradılması müzakirə edilib.

Bu barədə Kənd Təsərrüfatı Nazirliyi məlumat yayıb.

Məlumata görə, müzakirələr nazir Məcnun Məmmədovla Türkiyənin ticarət naziri Ömər Bolat arasında keçirilmiş ikitərəfli görüşdə baş tutub.

Tərəflər Qarabağda, eləcə də Naxçıvan Muxtar Respublikasında istehsal edilən məhsulların ixracı, eləcə də hər iki ölkədə keçirilən kənd təsərrüfatı sərgiləri sahəsində əməkdaşlıqla bağlı da fikir mübadiləsi aparıb.

Səfər çərçivəsində M.Məmmədov Türkiyənin kənd təsərrüfatı naziri İbrahim Yumaklı arasında ikitərəfli görüş də keçirilib. Görüş zamanı iki ölkə arasında kənd təsərrüfatı sahəsində mövcud əməkdaşlıq və onun genişləndirilməsi məsələləri müzakirə olunub. Tərəflər balıqçılıq sahəsində Türkiyə ilə əməkdaşlıq, bu sahədə son texnologiyaların transferi, iqlim dəyişikliyinin aqrar sahəyə mənfi təsirlərinin azaldılması istiqamətində təcrübə mübadiləsi və kənd təsərrüfatı ilə qida məhsullarının ticarət dövriyyəsinin artırılması məsələlərini nəzərdən keçiriblər.

M.Məmmədov Ankarada keçirilən IV Kənd Təsərrüfatı və Meşə Şurası çərçivəsində təşkil olunmuş “Kənd Təsərrüfatı Diplomatiyası Seminarı”nda iştirak edib.